Loluwari Média (Dili) – Diretór Ezekutivu Fundasaun Mahein (FM), Abel Amaral, hatete, FM lansa relatoriu polítika programasaun ba Polísia Nasionál Timor-Leste (PNTL), hodi responde lakunas no rekursu humanus, infra-estrutura no ekipamentu hodi avalia ba situasaun atual ne’ebé akontese.
“Ohin FM halo lansamentu relatoriu polítika programasaun PNTL atu responde lakunas rekursu humanus infra-estrutura no ekipamentu, relatoriu ne’e bazea ba peskiza ba estudus ida ne’ebé avalia ba situasaun atual PNTL ba nia organizasaun ba kooperasaun foka ba asuntu save sira ne’ebé mak ohin ha’u temi rekursu humanus infra-estrutura no ekipamentu sira”. dehan Diretór ezekutivu FM, Abel Amaral, ba jornalista sira, iha Bidau, Sexta (28/03).
Iha relatoriu governu tenke dezenvolve polítika programasaun ba PNTL ne’ebé dezenvolve liuhusi peskiza hodi halo dezenvolvimentu durasaun tempu naruk.
“Relatoriu ne’e deskobre katak presiza governu tenke dezenvolve polítika programasaun PNTL, polítika ida ne’e tenke dezenvolve liuhusi peskiza ka estudu atu dezeña programa ida ne’ebé mak foka ba asuntu investimentu no dezenvolvimentu ba tempu badak, tempu médiu no tempu naruk”. nia informa.
Polítika programasaun ba PNTL ne’e sei garante katak labele iha politizasaun hodi garante kontinuidade bainhira governu truka malu kada tinan 5 nafatin kontinua polítika programasaun PNTL.
Alende rekursu umanus iha PNTL daudaun ne’e seidauk halo rekrutamentu ba membru foun ne’ebé ho númeru naton bo’ot iha instituisaun PNTL no iha postu sira menus ba membru PNTL.
“Muda ba rekursu umanus daudaun ne’e PNTL seidauk halo rekrutamentu ba membru foun ne’ebé membru ne’ebé mak númeru ne’e naton iha postu ga munisípiu sira iha territóriu nasionál membru polísia menus teb-tebes komandante polísia viola sira nia direitu sira labele foti anual no labele foti lisensa ne’ebé nesesariu tanba ema menus teb-tebes. Entaun bainhira sira foti anual ne’e komandante polísia tenke bolu fila fali sira ba halo nia knaar entaun presiza tebes halo rekrutamentu ida ne’ebé bazea ba nesesariu no programa PNTL”.
Entre tantu rekrutamentu ba membru foun PNTL daudaun ne’e konsellu Ministru foti ona desizaun hodi halo rekrutamentu ba membru foun, tanba ne’e FM hato’o halo rekrutamentu ba nivel ofisiáis.
“Relasiona ho rekrutamentu ida ne’e daudaun ne’e governu halo hela no Konsellu Ministru (KM) halo ona desizaun atu halo rekrutamentu maibé FM hakarak hato’o katak rekrutamentu ne’e presiza mós iha nivel sira ne’ebé mak ofisiáis atu bele priense diretór nasionál sira ka diretór departamentu sira iha instituisaun PNTL, komandante unidade sira no komandante munisípiu sira ne’ebé bainhira rekrutamentu ne’e jerál de’it sira to’o tiha ona katuas ka ferik ona mak foin halo promosaun. Horseik iha promosaun ida ne’ebé governu halo promosaun governu mak lídera la’ós instituisaun PNTL”.
Pesoas ne’ebé halo promosaun ne’e serve halo servisu iha PNTL durante tinan barak. Maibé ho idade ne’ebé avansadu ona tanba ne’e presiza halo rekrutamentu ba ofisiáis ne’ebé ho idade produtivu sira hodi priense ba kargu hirak ne’ebé iha instituisaun PNTL.
“Ema sira ne’ebé mak halo promosaun ne’e servi tinan barak ona iha instituisaun PNTL, sira idade ida ne’ebé mak kuaze avansadu ona tanba ne’e mak tenke presiza iha rekrutamentu ida ba ofisiáis nian atu nune’e idade produtivu ne’e bele priense vaga sira ne’ebé mak hanesan ohin ha’u temi diretór unidade sira diretór departamentu ba komandante unidade ho komandante munisípiu sira”. nia haktuir.
Jornalista : Anis