Loluwari Média (Díli) – Segundu Komandante Jeral Polísia Nasionál Timor-Leste (PNTL), Komisariu polisia, Pedro Belo, hatete ohin loron importante ba formador sira iha Centru Formasaun Polísia (CFP) selebra Promosaun Diviza ida ne’e.
“Ohin imi simu promosaun diviza ida ne’e bele sai hanesan ponte motivador no inspirasaun atu ita hametin etika servisu ba membru PNTL iha CFP no mós ba povu tomak.” Dehan Segundu Komandante Jeral Polísia Nasionál Timor-Leste (PNTL), Komisariu polisia, Pedro Belo, iha nia diskursu iha CFP hafoin fo promosaun Diviza ba Membru CFP 64 iha Comoro, Dili, kuarta (14/05).
Pedro husu ba Formador sira atu kontinua hadia kualidade iha sentru formasaun, nia kualidade treinamentu aprendizajen no kurikulum.
“Ho kualidade treinamentu ne’e iha objetivu atu hadia kadetes foun no rekruta ba kuñesimentu no abilidade kona-ba kna’ar no dever iha instituisaun Polísia Nasional Timor-Leste no ba Timor-Leste.”
Belo husu ba Formador sira iha dever no obrigasaun atu forma karakter no etika ba kadetes no ba rekrutamemtu sira atu kuda valór onestidade disipliña no responsabilidade hodi respeita lei Instituisaun PNTL.
“Ha’u husu ba membru ida-idak atu iha vontade no halo sakrifísiu no dedikasaun tomak no ita bo’ot sira sai hanesan exemplu diak ba rekrutamemtu ou kadetes foun nia kuñesimentu no abilidade ho ida-idak nia atividade no hahalok.”
Membru hotu-hotu hein atu hetan promosaun tranzitoria maibé nunka akontese. Maibé ho imi nia pasensia ohin loron instituisaun PNTL konsege realiza ona promosaun tranzitoria ba imi hotu.
“Husu nafatin mantein disipliña no kredebilidade nu’udar membru PNTL, ha’u husu ba ita bo’ot sira hotu hodi responsabilidade ba konfiansa povu no nasaun nian ne’ebé tula iha ita nia kabas hodi servi rai no povu ida ne’e.”
“Ha’u husu ba membru Formador sira atu aprende nafatin siénsia Polísia nian hodi dezenvolve ita bo’ot sira nia kapasidade lidera hodi halo kolaborasaun no kooperasaun hodi dezenvolve instituisaun PNTL ba futuru ho diak.”
Komandante Sentru formasaun Polísia (CFP), Superintendente Polísia Nuno dos Santos, hatete, CFP nia papel importante tebes tanba nu’udar espasu ida atu kapasita membru PNTL sira atu servi instituisaun PNTL ho diak ba futuru.
“Membru PNTL iha CFP hamutuk 64 kompostu husi feto na’in 11 mane 53 ne’ebé ohin hetan promosaun tranzitoria bazeia ba lei organiza PNTL dekreitu lei numeru 34/2024.”
Membru Superiór na’in 4 no membru inspetór xefe hamutuk na’in 11, inspetór na’in 4, Inspetór Asistente na’in 16, Sargentu xefe na’in 5, primeiru Sargentu na’in 1, Agente xefe na’in 17, Agente prinsipal na’in 10 ne’ebé hetan opurtunidade promosaun tranzitoria.
Jornalista : Chay Risky