Loluwari Média (Dili) – Komandante Operasaun Munisipiu Dili, (KOMD), Superintendente Assistente Polisia, José Luis Amaral, informa, Komandu PNTL Munisipiu Dili agradese ba Ministeriu Saude (MS) no Menzies Timor-Leste tanba konsege halo sosializasaun kona-ba Metodu Wolbachia hodi kombate moras Dengue iha Timor-Leste (TL), sosializasaun informasaun ne’e importante tebes ba membru Polisia Komunitaria no membru Polisia OPS sira atu fahe tutan informasaun ne’e ba komunidade sira, tanba Polisia Komunitaria mak besik liu komunidade sira.
“Ha’u hanoin sira mai halo sosializasaun kona-ba Metodu Wolbachia ne’e importante tebes ba ita no mos ba komunidade, liliu ba Polisia Komunitariu sira, tanba sira mak bele liu komunidade, sira bele fahe tutan informasaun ne’e ba komunidade, atu nune’e susuk ne’e bainhira sira husik iha ita nia rai, sira labele hakfodak.” Dehan KOMD, Superintendente Assistente Polisia, José Luis Amaral, ba jornalista sira iha KMD, sexta (30/05).
“Ministeriu Saúde (MS) hamutuk Menzies Timor-Leste, realiza sosializaun kona-ba Metodu Wolbachia ba membru Polisia Nasional Timor-Leste (PNTL) hodi hatene no fahe tutan informasaun ba komunidade sira saida mak Wolbachia no mos Wolbachia ne’e atu halo saida. Nia afirma.
Ministeriu Saúde liuhusi diretór, Diresaun Nasional Edukasaun Promosaun Saude, Estevão Mariz, hatete, Ministeriu Saude hamutuk Menzies Timor-Leste, mai iha Komandu PNTL Munisipiu Dili kona-ba Metodu Wolbachia ba membru Polisia iha Komandu MD.
“Antes ita atu implementa Métodu Wolbachia loloos liliu ba munisipiu Dili ita tenke halo sosializasaun ba Komunidade no mos to’o Instituisaun, tan ida ne’e mak parte PNTL importante tebes, liliu asegura implementasun programa tanba ida ne’e ami fo informasaun ba sira atu nune’e sira tenke hatene Metodu Wolbachia.”
“Sosializasaun ba membru PNTL ne’e importante tebes, tanba liuhusi sosializasaun ne’e atu hasa’e sira nia koñesimentu Metodu Wolbachia ba membru Polisia sira.
“Programa ne’e ita sei iha faze preparasaun, saida-saida mak ita persiza atu halo mak ba iha advokasia, sensibilizasaun no mos mobilizasaun iha komunidade, tanba ne’e ami nia ekipa hamutuk ho Menzies halo sosializasaun no mos halo mobilizasaun iha komunidade.”
“Sira mos iha atividade seluk ne’e sira hala’o mak mobilizasaun avizu husi kareta ne’ebé tama sai hela bairro-bairro sira fo informasaun kona-ba Metodu Wolbachia rasik.”
“Iha Metodu ne’e rasik, ita sei implementa liliu prevensaun ba moras Dengue, ne’ebé ita sei husik susuk Wolbachia ne’e iha fulan Julu to’o novembru depois ita sei halo monitorin fila-fali, karik susuk ne’e iha duni Wolbachia ga la’e.”
Jornalista : Chay Risky