Loluwari Média (Manufahe) – Presidenzia Republika (PR) liuhusi Diresaun Servisu Sociedade Sivil no Asuntu Sosial Lansa Uma Ida ba familia oan kiak na’in neen (6) iha aldeia Riatu, suku Daisua, postu administrativu Same, munisipiu Manufahi.
Koordenadora Diresaun Servisu Sosial no Asuntu Sosial, Teresa dos Santos Ximenes, hatete, apoiu hirak ne’e nu’udar sentimentu solidaridade husi Prezidente Repúblika atu fahe Domin ba oan kiak na’in neen (6) atu sira na’in neen bele hetan mahon ne’ebé diak nune’e sira bele kontinua estudu iha fururu.
“Uma ne’ebe ita nia sua exelensia Prezidente Republika apoiu ba ita nia familia oan kiak na’in neen ne’e ho medida 8×7 inklui haris fatin, dapur no kios atu nune’e sira bele utiliza uma ne’e no hein kios atu hatutan sira nia moris ne’e no uma ne’e nia durasaun ba kontrusaun durante fulan tolu.” Dehan Kordenadora Diresaun Servisu Sosial no Asuntu Sosial, Teresa do Santos Ximenes ba jornalista sira iha Same, (29/05).
Teresa haktu’ir, oan kiak na’in neen ne’e nia inan fila hikas ona ba Aman Maromak nia kadunan santu no nia aman agora dadur hela iha prizaun, durante ne’e sira na’in neen hela ho nia avo, sira no avo mak tau matan ba sira nia nesidade lorloron.
Tanba ne’e mak ita nia Na’i Prezidente Republika hakarak oferese nia domin liuhusi hari’i uma ba ita nia oan kiak na’in neen (6) ne’e atu sira bele satan loron nia manas anin nia sut no mahoven nia malirin iha tempu kalan no loron. Nia afirma.
Kordenadora Diresaun Servisu Sosial ofisialmente halo lansamentu primeira pedra ba uma ho medida 8×7 ne’e ba oan kiak sira.
Alicia Barros nu’udar oan kiak ho matanben hodi hato’o liafuan agredesimentu ba Na’i Prezidente Repúblika, tanba bele apoiu ona Alicia ho nia alin na’in 5 ne’ebé durante ne’e hela de’it ho uma tatis iha Munisipiu Manufahi Postu Administrativu Same.
“Ha’u lori ha’u nia alin na’in lima (5) nia naran hato’o ami nia agradesimentu bo’ot ba Na’i Prezidente Repúblika, tanba bele fo nia domin hodi hari’i uma mai ami oan kiak na’in neen (6) ne’ebé durante ne’e moris iha susar nia laran hodi fasilita ami oan kiak sira atu bele asesu ba eduksaun iha postu administrativu Same no mos ba ami nia propinas kada fulan sei gratuita atu nune’e ami bele kontinua ami nia estudu ne’e ba Futuru.”
Iha lansamentu primeira pedra ne’e hetan partisipasaun maximu husi Autoridade lokal suku Daisua, Amorin da Costa Sarmento no reprezentante Administrador munisipiu Same, Diretór Servisu Komunitariu Vidal dos Santos.
Jornalista : Chay Risky