Loluwari Média (Dili) – Komandante Jeral Polisia Nasional Timor-Leste (PNTL), Komisariu Jeral Polisia, Henrique da Costa, hatete, Komandu PNTL sei halo desizaun ba membru sira ne’ebé foin daudauk hetan promosaun diviza sa’e ona ba Inspetór Asistente maibé nafatin halo knaar iha patrullamentu Komandu sei muda nia ba fatin seluk tu’ir nia diviza ne’ebé nia iha.
“Ita mos sei halo rekolokasaun ba sira ne’ebé mak dala ruma diviza hetan ona promosaun ho diviza bo’ot mas sira sei iha hela patrulla ou sira laiha kargu ruma, karik ita haree ida ne’ebé mak iha kapasidade sufisiente ita koloka ba kargu ruma atu nune’e sira bele halo servisu.” Dehan Komandante Jeral Polisia Nasional Timor-Leste (PNTL) Komisariu Jeral Polisia, Henrique da Costa, ba jornalista sira hafoin tula diviza ba membru PNTL ne’ebé moras na’in hitu iha Becora, tersa (03/06).
Komandante Jeral PNTL promete sei fornese formasaun baziku lideransa nian ba membru PNTL ne’ebé promovidu tiha ona.
“Ba sira ne’ebé promovidu ne’e ita tenke prepara kursu ruma ba sira tanba balu ne’ebé diviza ajente nia promove ba sarjentu no balu ne’ebé sarjentu promove ba inspetór sira ne’e seidauk iha formasaun. Entaun Komandu atu prepara programa iha tempu badak sei relaiza uluk kursu lideransa baziku ba ita nia membru sira ne’ebé mak promove husi ajente ba ajente Xefe, Serjentu ba inspetór Xefe para maiz ou menus sira hatene planu operasaun ruma, planu atividade atu nune’e sira dirije sira nia membru sira ne’e nune’e sira iha kuñesimentu atu dirije.”
Kona-ba salariu no remoneratoriu ba membru PNTL, Henrique hatete, membru PNTL promovidu balu iha ona mudansa salarial ba sira hafoin Komandu halo tiha promosaun diviza ba sira.
“Sira nia direitu sei la lakon, sira nia salariu ba diviza foun ne’e iha balu iha ona mudansa purezemplu ba sira ne’ebé promove ba ajente xefe no ba sira ne’ebé promove ba inspetór no inspetor xefe agora nia manan ona osan tu’ir inspetor xefe nian. ida ne’e mak ita halo, so ke obstakulu ba Komandu mak ne’e iha orsamentu 2025 ita lakoloka ba promosaun ninia, entaun halo pagamentu ita sei menus balu iha ba salariu baziku nian iha fulan hirak tu’ir mai.”
komandu prepara ona proposta hodi hato’o ba iha Ministeriu Interior nune’e bele haree kestaun sira ne’e se lae iha fulan hira tu’ir mai labele simu osan tanba osan ne’ebé koloka ne’e koloka bazeia ba iha diviza ida anterior ninian. Ida diviza agora sei koloka ba 2026.
Jornalista : Chay Risky