Loluwari Média (Dili) – Komandante Jeral Polisia Nasional Timor-Leste (PNTL), Komisariu Jeral Polisia, Henrique da Costa, halo promosaun diviza ba membru polisia na’in hitu (7) ne’ebé agora daudaun moras permanente iha uma.
“Ita nia membru na’in hitu (7) ne’ebé mak ohin ita fo promosaun Diviza mak, Paulino Ximenes, promove ba Inspetór, Constancio Carlos, promove ba sargentu xefe, Raul Filipe dos Reis Soares, promove ba primeiru sarjentu, Silvino Soares, promove ba sarjentu Xefe, Ananias Pires, promove ba Inspetór Asistente, Regina dos Santos promove ba sargentu xefe no Marcos Silva “Yes Timor” promove ba Primeiru sarjentu tanba sira ne’e hotu balu sofre moras struk no balu moras komplikadu tanba ne’e mak ohin ita mai to nia rezidensia hodi tula diviza ba sira.” Dehan Komandante Jeral Polisia Nasional Timor-Leste (PNTL), Komisariu Jeral Polisia, Henrique da Costa, ba jornalista sira iha Bekora, tersa (03/06).
Henrique dehan membru na’in hitu ne’e balu antes ne’e servisu hanesan departamentu tranzitu seguransa rodaviaria munisipiu nian no balu antes ne’e nu’udar membru patrollu iha Komandu Munisipiu Dili, no iha membru na’in rua mak antes ne’e servisu hanesan departamentu iha eskuadra Dom Aleixo, inklui eskuadra Cristo-Rei nian.
“Objetivu halo promosaun deviza ba membru na’in hitu ne’e tanba ita iha serimonia promosaun deviza ne’ebé mak komandu Jeral PNTL, halo iha 26 Maiu foin lalais ba membru Komandu PNTL Munisipiu Dili sira la partisipa tanba ne’e mak Komandante Jeral PNTL Komisariu Jeral ba vizita membru na’in hitu referida atu tula direita ba sira iha ida-idak nia rezidensia.”
Komandante Jeral PNTL Komisariu Jeral Polisia, Henrique da Costa, ba halo uluk promosaun diviza ba membru PNTL ne’ebé hela iha Kintal Bo’ot no kontinua ba iha Manu-Meta Rai-Hun na’in, no kontinua ba iha Aitarak-Laran, no mos iha Comoro na’in rua, Bidau Akadiru-Hun ida no Becora na’in ida, iha biban ne’e Komandante Jeral PNTL observa direita membru hirak ne’e nia kondisaun no konsidera katak membru hirak refere kondisaun la permite atu halo servisu tanba balu infrenta moras estruk no balu moras komplikadu.
Henrique, hatete, Komandu PNTL halo promosaun diviza ba membru PNTL sira iha sira ida-idak nia rezidensia tanba sira moras ne’ebé labele tu’ir atividade promosaun diviza tranzitoriu ne’ebé halo Maiu iha Komandu Munisipiu Dili.
“Ita hatene katak promosaun diviza tranzitoriu ba membru PNTL sira halo ona iha 27 Marsu no ba promosaun diviza ba membru Komandu PNTL Munisipiu Dili iha 26 Maiu fulan kotuk. Sira ne’ebé moras mak labele partisipa iha serimonia refere. Tanba ne’e mak horseik Komandante Munisiu Dili informa ba ha’u katak iha ita nia membru na’in hitu mak moras no momentu ne’eba sira labele partisipa no husu atu mai tula diviza ba sira. Entaun ohin ita identifika Komandu Munisipiu Dili nian iha ema na’in hitu. Ita rekuñese katak sira nian kontribuisaun ba instituisaun asegura pas no estabilidade Timor-Leste. Entaun ita valoriza sira ita to’o sira nia fatin tula diviza ba iha membru sira.”
Forma ida ne’e simboliza katak Komandu Jeral kontinua valoriza membru sira nia servisu maske momentu ne’eba sira la partispa serimonia promosaun diviza tranzitoria maibé Komandu kontinua valoriza sira nia dedikasaun ba Timor-Leste.
“Atividade ida ne’e komandu halo ba komandu munisipiu sira inklui ba unidade sira tanba iha Unidade Espesial Polisia iha na’in tolu mos moras permanente no Komandu ba halo promosaun diviza iha sira nia uma”.
“Promosaun diviza ne’ebé mak halo iha membru ne’ebé moras ninia rezidensia ida ne’e la hatun sira nia valor hanesan membru PNTL, tanba balu antes ne’e halo promosaun iha Palasiu no balu iha Komandu Munisipiu ida-idak. Maibé balu ne’ebé moras hela ne’e tula diviza iha sira nia uma. Ida nee la hatun sira iha valor, komandu nafatin hatudu katak komandu rekuñese sira nia kontribuisaun durante tempu naruk nia laran ba iha institusaun Polisia Nasional Timor-Leste no ba rai ida ne’e.”
Dadus PNTL ne’ebé moras maibé sei mai halo servisu inklui sira ne’ebé moras permanente ne’e hamutuk na’in ualu nulu resin nune’e Komandu Jeral PNTL liuhusi Departamentu Saúde Komandu Jeral PNTL kontinua fo tratamentu saúde ba membru ne’ebé moras. Komandu mos koopera ho Ospital Nasional Guido Valadares halo tratamentu ba membru sira ne’ebé sofre moras permanente.
“Departementu saúde Komandu Jeral kontinua fo tratamentu ba sira depois koopera ho Ospital Nasional Nssional no Ospital ne’ebé besik para sira halo tratamentu diak ga la’e ne’e komandu la garante maibé komandu nafatin tau atensaun ba sira liuhusi Komandu Jeral PNTL atu fo tratamentu ba membru PNTL ne’ebé moras.”
Jornalista : Chay Risky