Loluwari Média (Díli) – Komandante Operasaun Polísia Nasionál Timor-Leste (PNTL), Superintendente Xefe Polísia, Justino Menezes, hatete, Komandu operasaun PNTL realiza enkontru preliminar ba Komandante supervizaun PNTL no Komandu Munisípiu Díli (KMD), Komandante Unidade Espesiál Polísia (UEP), Komandante Unidade Patrullamentu Fronteira (UPF) no Komandante Unidade Polísia Maritima (UPM) inklui Komandante Sentru formasaun Polísia (CFP).
“Ohin ami nia enkontru, ami aprezenta planu operasaun ne’ebé mak sei hala’o hodi fo seguransa maximu ba ita nia jogu Comunidade Paizes Lingua Portuguesa (CPLP).” Dehan Komandante Operasaun Polísia Nasionál Timor-Leste (PNTL), Superintendente Xefe Polísia, Justino Menezes, ba jornalista sira, iha Kuartel Jerál PNTL, hafoin enkontru ho Komandante sira hotu, kuarta (02/07).
Menezes hatete, iha 17 Jullu to’o 26 Jullu, ohin enkontru dahuluk ho Komandante sira hotu atu elabora planu operasaun diak ba jogu CPLP.
“Ita nia eventu internasional ne’e sei partisipa husi Nasaun CPLP tanba ita nia Modalidade jogus ne’ebé hala’o kuaze ho idade 16 ba kraik ne’ebé tu’ir Modalidade ne’ebé iha ona tanba ne’e autoridade seguransa sei fo seguransa maximu ba eventu bo’ot nee.”
Komandu operasaun PNTL mos husu, Autoridade lokal sira responsabilidade ba komunidade atu informa ba komunidade sira hotu iha aldeia suku no postu Admistrativu bele kontribui paz no estabilidade iha Timor-Leste.
“Hahu iha 17 ita nia maluk nasaun CPLP mai konsentra iha Timor-Leste hodi hala’o desportiva tanba ne’e hau husu ba Komandante sira hotu atu komanda nia membru sira ne’ebé sei hala’o seguransa ba eventu ida ne’e, PNTL sei hatun membru ho maximu atu fo seguransa ba eventu bo’ot ne’e no apoiu husi Komandu Munisipiu sira hotu.”
Jornalista : Chay Risky