Loluwari Média (Díli) -Padre Paróquia Imaculada Conceição de Balide Díli, Angelo Salsinha, louva membru Tunggal Hati Seminari-Tunggal Hati Maria (THS-THM) tanba durante tinan 24 nia laran ezistensia THS-THM zero violensia.
Padre Parókia Angelo Salsinha, hato’o lian hirak ne’e ba membru THS-THM sira tanba foinsa’e sira organiza eventu jogu amizade THS-THM Balide Cup ho inisiativa no inovativu tebes.
“THS-THM ne’e durante 24 anos ezistensia zero violensia katak fini di’ak iha imi ida-idak iha THS-THM fini di’ak ne’e barak teb-tebes maibé la organiza dadaun hanesan ne’e, laiha inisitiva laiha kreatividade laiha inovasaun,”dehan nia ba jornalista sira iha kampu futsal Polisia Militar Balide segunda, (13/04).
Nia informa,Membru THS-THM halo tuir ona Padre Martinho Hadi Wijoyo nia mehi ne’ebé durante nia halo tanba hakarak foinsa’e sira iha kreatividade no inovativu.
“THS-THM ida ne’e mak Amo Hadi mehi hela ba rai ida ne’e no ba mundu, imi hatene ha’u gosta ema ne’ebé mak iha kreatividade iha inisiativa ne’ebé inovativu ida ne’e mak ha’u gosta, ha’u la gosta ema hirak ne’ebé mak buka mak problema deit-problema deit”dehan nia.
Nia esplika, THS-THM la’os artemarsias tanba senam sira ne’ebé halo ne’e atu fó gloria ba Maromak, fó glória ba rai doben Timor no povu no ba igreza.
“Senam sira ne’e mak ita halo ne’e senam daur, senam ida ne’ebé halo ita atu bele hatene jogu oinsa ritu ida oinsa, tanba ne’e mak ita laos artemarsiais”dehan nia.
Joven tenke sai masin no naroman,joven ida ne’ebé sai solusaun ba nasaun kuandu nasaun presiza, sai solusaun ba uma kreda bainhira presiza hatudu husi talentu matenek komprimisu buat sira ne’ebé mak jovens sira halo dadauk.
Membru THS-THM Julio da Costa Oliveira Pinto, jogu amizade ne’e mós hanesan parte ida hodi hatudu domin ba maromak liu husi hadomi ba malu.
“liu husi ita nia rekonsilia ba malu liu husi ita nia hamutuk ita kria amizade,” Julio dehan.
Eventu ida ne’e,Nia dehanz hanesan inisiu ne’ebé atu hafanu fila-fali membru sira nia espiritu unidade tanba mesak membru Tunggal Hati Seminari Tunggal Hati Maria.
Enkuantu Sekretaria Komisaun Organizadora Moizes da Costa hatete,eventu ne’e atu bolu fali-fila membru THS-THM sira iha kada ranting atu organiza malu hodi hamoris fali ranting ida-idak nian.
“Realiza aktividade ida ne’e atu akumula membru THS-THM sira hotu ne’ebé mak iha distritál Dili nian, durante aktividade barak mak paradu”dehan nia.
Tanba ne’e,sira forma komisaun ida atu nune’e bele realiza kona-ba jogu futsál para oinsa sira ida-idak iha hanoin ona mak ba ida-idak nia Parókia atu hamoris liu tan organizasaun ne’e.
Entretantu membru THS-THM ne’ebé rejistu tuir eventu ne’e hamutuk klubu 21 ba THS klubu 16 no THM klubu 5.no suporta husi Ajensia Zeus Travel ho montante orsamentu hamutuk $2000 dolar amerikanu.
Jornalista : Alberto Pires
Editor : Herminio Cardoso