Loluwari Média (Lautém) – Autoridade suku Daudere, Ajito Boavida, informa, mata dalan planu Nasional Dezenvolvimentu Suku (PNDS) maka fo komunidade aldeia Macalodo bele hetan hodi rehabilita estrada antigu iha suku Daudere postu administrativu Lautem, munisipiu Lautem.
“Ita nia PNDS ne’ebé mai ho ninia mata dalan ne’ebé sei regula tu’ir atividade PNDS nian, tanba kada tinan la’o dala ida. Tanba ne’e ohin ita tau primeira lansamentu ida ne’e husi tipu projetu ne’ebé mak iha, ita hala’o mak rehabilita estrada antigu aldeia Macalodo nian ho nia orsamentu mak $ 25.000.00.
Entaun ita hare estrada ne’ebé maka grave ita halo uluk ida ne’e no tu’ir durasaun servisu ba kompaña.” Dehan, xefe suku Daudere Ajito Boavida, ba loluwari.tl hafoin lansamentu iha Aldeia Macalodo, segunda (28/07).
Lider komunitariu ne’e explika, PNDS nia programa prioridade atu responde preokupasaun komunidade liuhusi enkontru hamutuk ho xefe aldeia foti desizaun hodi implementa programa ba rehabilitasaun estrada urbana aldeia Makalodo.
“Ita nia suku Daudere iha aldeia 8 prioridade mai husi komunidade rasik liuhusi enkontru komunitariu ne’e xefe suku deside orienta xefe aldeia sira atu konvoka enkontru iha aldeia. Liuhusi enkontru komunitariu mak komunidade ho autoridade aldeia defini prioridade ne’ebé mak tau iha planu xefe aldeia nian depois assembleia suku kona-ba preparasaun proposta prioridade mai atu ita la’o tuir Programa PNDS.”
Estrada ne’e ezisensia husi komunidade rasik, tanba povu hakarak mai hela iha nia knua de’it sira nia produtu lokal sira maibé maioria sente todan uitoan tanba ladun assesu estrada no eletresidade, entaun povu maioria muda husi ninia knua ne’ebé produtu lokal barak tanba ne’e liu husi programa sira nee povu sente kontente tebes hato’o sira nia prioridade aldeia, ne’eduni autoridade mos hare komunidade nia nessesidade rehabilita estrada ne’e importante tebes.
“PNDS rehabilita estrada ho orsamentu ne’ebé ki’ik liu entaun ita halo tu’ir estrada ne’ebé orsamentu PNDS iha no ita labele halo hotu ita haree mos ho tekniku PNDS nian ba estrada ne’ebé mak grave atu nune’e tempu udan labele difikulta komunidade sira nia movimentu.”
“Programa PNDS ne’e atu komunidade kolabora hamutuk hodi rehabilita estrada antigu sira ne’e to’o finaliza mak importante.
Xefe aldeia Macalodo, João Martins, hatete, komunidade aldeia Macalodo iha produtu lokal barak maibé estrada mak difikulta sira nia movimentu atu lori sira nia produtu lokal ba merkadu.
“Ita nia komunidade presiza estrada ne’e duni bainhira estrada ne’e diak sira bele lori sira nia produtu lokal ba merkadu nune’e sira nia ejizensia prioridade mak estrada no eletrisidade, ita nia komunidade iha aldeia Macalodo uma kain hamutuk 58 ho total populasaun 223.”
Komunidade aldeia Macalodo, Alfredo Pires, sente kontente, ho programa PNDS ne’ebé tanba atu rehabilita sira nia estrada ne’ebé tinan barak aat total hodi difikulta sira nia movimentu atu lori sira nia produtu lokal ba merkadu.
“Programa PNDS ne’ebé ami nia autoridade lokal tau prioridade ba ami nia estrada antigu mai aldeia Macalodo nu’udar benefisiariu ami agradese, tanba bele halo rehabilitasaun ba ami nia estrada nune’e ami bele assesu ba mai no ami bele lori ami nia produtu lokal ba iha merkadu postu Lautém no postu Lospalos.”
Jornalista : Aldo