Loluwari Média (Quelicai) – Koordenadóra Unidade Sosiédade Sivil no Apoiu Sosiál Palásiu Prezidensiál, Tereza dos Santos Ximenes, informa, ekipa Servisu Sosiédade Sivil Palásiu Prezidensiál lori ekipamentus Desportu; Farda Futeból 50, Farda Volleyball 50, Sapatu ba Estudante sira 60 inklui ropa ba Estudante Orfanatu hamutuk 60 ba estudante Orfanatu sira atu utiliza ba sira nia nesesidade.
“Ohin ami husi ekipa Unidade Sosiédade Sivil Palásiu Prezidensiál lori ekipamentus Desportu hodi entrega ba ita nia estudante Orfanatu sira no apoiu hirak ne’e mai husi ita nia sua exelensia Prezidente Repúblika (PR), José Ramos-Horta, ba estudante Orfanatu sira depende saida mak imi presiza.” Dehan Koordenadóra Unidade Sosiédade Sivil no apoiu Sosiál Palásiu Prezidensiál ba jornalista sira iha Quelicai, Baucau, Kuarta (03/09).
Nia hatete, prezidente Repúblika iha nia inisitiva rasik atu apoiu komunidade sira, liliu estudante Orfanatu sira ne’ebé presiza.
“Ohin ami lori ekipamentus Desportu nian mak farda futeból no Bola Volley no Bola tebe nian (kaki) inklui Sapatu no ropa depende ba imi nia nesésidade ne’ebé imi presiza ho ida ne’e ita nia sua exelensia Prezidente Repúblika hakarak apoiu imediata ba imi.”
“Ekipamentus ne’ebé Prezidente Repúblika apoiu mai orfanatu husi Santa Terezina Quelicai ne’e mai husi Prezidente Repúblika, nia Belun diak husi Japaun no Xina mak oferese mai iha Palásiu Prezidensiál hodi fo apoiu ba komunidade no Estudante Orfanatu sira.”
“Kona-ba Ekipamentus múzika nian ami ohin seidauk lori mai, tanba presiza iha proposta ofisiál ba Prezidente Repúblika bainhira aprova mak ami bele lori mai.”
Iha sorin seluk Padre, enkaregadu Lar Santa Terezina Quelicai, Albino Fernandes, agradese ba excelénsia Prezidente Repúblika nia fuan bo’ot ba estudante Orfanatu sira ne’e nafatin iha Prezidente Repúblika nia fuan hodi apoiu ekipamentus Desportu nian mai to’o iha fatin ida ne’e.
“Ami nia agradesementu klean ho kontente tebes ba Prezidente Repúblika nia apoiu ekipamentus Desportu ida ne’e mai ami signifika Prezidente Repúblika nia fuan nafatin iha estudante, liliu foinsa’e Orfanatu sira. Tanba bele apoiu Ekipamentus sira ne’e mai to’o iha ami nia fatin.”
Estudante sira mos agradese tebes ba ekipa Sosiédade Sivil nia servisu makaas ho laran luak hodi esforsu ba Estudante foinsa’e Orfanatu sira ne’ebé futuru nasaun ida ne’e nian, tanba estudante Orfanatu hamutuk 51 ne’ebé mai husi munisípiu la hanesan ne’ebé oras ne’e aprende hamutuk iha Lar Dom Bosco Quelicai.
“Ami nia orasaun sei la nahas iha ami nia fuan atu hato’o ba ita nia Prezidente Repúblika no mos ba Ekipa Sosiédade Sivil hotu tanba imi nia esforsu makaas ohin loron ekipamentus desportu nian bele to’o mai iha fatin ida ne’e.”
Estudante Orfanatu, Angelino Rui Gomes, sente kontente bainhira exelénsia Prezidente Repúblika (PR), José Ramos-Horta, ne’ebé ho fuan bo’ot ajuda ekipamentus Desportu nian ba sira.
“Ha’u nu’udar estudante sente kontente, tanba durante ne’e ami Orfanatu sira laiha Farda Bola nian no ami laiha bola maibe ita nia Prezidente Repúblika ho fuan bo’ot hodi hanoin ami Estudante Orfanatu sira hodi oferese Farda Bola no mos Sapatu inklui Bola Futeból no Volleyball mai ami, nune’e ami bele utiliza ba ami nia atividade Desportu”.
Jornalista : Chay Risky