Loluwari Media (Dili) – Governu Austrália no Governu Timor-Leste liu husi Sekretáriu Estadu Igualidade (SEI), halo akordu subsidariu entre governu rai rua hodi implementa programa Nabilan faze III ho montante osan $ 22 millaun tau importánsia hapara violensia hasoru feto no labarik feto sira iha Timor-Leste.
Embaixador Australia iha Timor Leste, Edward Wilkinson Charge d’Affaires, governu Australia sente halo kooperasaun ho governu Timor-Leste, halo akordu ida ne’ebé subsidariu hodi kontinua programa Nabilan faze III ne’ebé importante husi governu Austrália nian hodi apoiu dezenvolvimentu iha area Igualidade jéneru iha Timor-Leste.
“Governu Austrália kontente tebes atu mai iha ne’e, ohin loron atu asina aranjamentu subsidiariu entre governu Austrália no Governu Timor-Leste atu kontinua servisu importante ba programa Nabilan. Programa ne’e importante realiza, Austrália nia komprimisiu atu apoiu dezenvolvimentu iha area Igualdade jéneru iha Timor-Leste ho governu Austrália”. dehan Embaxador Austrália iha Timor-Leste Edward Wilkinson Charge d’Affaires, iha salaun Maria Gorrete, SEI tersa (02/09).
Governu Austrália apoiu osan montante $ 22 millaun ba tinan 5 nian, tanba ne’e governu Austrália orgullu hodi apoiu Sekretáriu Estadu Igualidade (SEI) hodi kontinua programa Nabilan.
“Governu Austrália komprimisiu ba osan millaun 22, ba tinan lima no ami orgullu atu hetan opurtunidade atu apoia exelensia Sekretáriu ho ninia ajenda iha ne’e no servisu importante. Orsamentu millaun $ 22 ba tinan liman atu kontinua programa”. informa Embaxador Australia.
Sekretáriu Estadu Igualidade (SEI), Elvina de Souza Carvalho, apresia governu Austrália fo orsamentu ba sekretariu estadu Igualdade kontinua programa Nabilan faze datoluk ne’ebé implementa ona iha tinan 2014.
“Ha’u hanoin em primeiru lugar SEI hakarak atu hato’o apresiasaun kle’an ba governu Austrália ne’ebé maka kontinua apoiu governu Timor-Leste, liliu SEI iha programa Nabilan, programa Nabilan ne’e nu’udar programa ida ne’ebé mak tama ona faze datoluk implementasaun la’os foin primeira ves implementa, maibé dezde 2014, nia implementasaun faze primeiru agora tama ona faze datoluk”.
Elvina hatete, implementasaun programa ne’e husi The Ásia Fundation ne’ebé bolu programa Nabilan.
Enkuantu programa ne’e komprimisiu husi governu Austrália no governu Timor-Leste atu investe ba implementasaun planu asaun nasionál Violensia Bazea ba Jéneru (VBJ) ne’ebé governu Timor-Leste, adopta hodi halakon no elimina kualker tipu violensia Bazea ba Jéneru hasoru feto no labarik.
“Programa ne’e nu’udar komprimisiu ida mós husi governu Austrália no governu Timor-Leste, atu investe ba implementasaun planu asaun nasionál Violensia Bazea ba Jéneru ne’ebé maka governu adopta hodi halakon no mós elimina kualker tipu violensia ka violensia Bazea ba Jéneru hasoru feto no labarik feto sira”.
SEI garante no akompaña besik ho klean ba implementasaun fase datoluk subsidariu agreement laiha impaktu maibé fó pozitivu ba prevensaun Violasaun Bazea ba Jéneru no prevensaun kualker tipu violensia hasoru feto no labarik feto sira iha Timor-Leste.
Jornalista : Anis