Loluwari Media (Dili) – VIAZEN moris to’o ona ninia rohan, novidades triste husik hela retratu malahuk iha Estátua Saudozu Francisco Xavier do Amaral nia oin.
Eh kuitadu…Saudozu Xavier nia estátua kal laran tanis la haree ona avó Faluk Feliciana Mendonça tinan (55) ne’ebé baibain faan sasan iha trotoar leten.
Francisco Xavier do Amaral nia lia-fuan, [Hanesan ha’u ko’alia bebeik ita nia povu sei mizeravel,sei iha moras oioin, ne’e dunik ita tenke luta].
“Lorloron ha’u tuur iha ne’e faan Bua, Malus, Ahu, Has budu no Hudi Sona de’it maibé dala-ruma ema la sosa”intervista badak ho jornalista Loluwari.tl.(04/10).
Tinan naruk nia sofre moras asma, maibé nia obriga an tutur bote bosan iha ulun ba tuur iha estatua Xavier ho Ministériu Trasporte Komunikasaun nia oin.
Nia nahe karon tau sasan iha leten hodi hein osan na’in sira, karik hetan sorte di’ak loron ida bele hetan $5.00 dolar.
Tinan lima ba kotuk Insidente mina gazolina rabenta ahi han Feliciana ho nia oan mane boot ne’ebé la konsege salva nia vida.
Faluk Feliciana iha oan na’in haat maibé feto ida-mane ida husik ona mundu ho nia aman, ne’ebé hela de’it mane na’in rua.
Avó Feliciana Orijen husi Munisipiu Aileu maibé hela iha Suku Kaikoli Aldeia Sentru Unidade.
“Bainhira ema sosa ha’u iha osan ha’u bele hola foos karon se la to’o ami hola foos lata, dala-ruma ami tein modo laiha ami han maran de’it”avó ne’e konta.
Negosiante Uraca dos Reis da Silva dos Santos, ne’ebé mós faan sasan haree avó Feliciana, triste bainhira tuur iha dalan ninin faan sasan.
“Ha’u faan sasan iha ne’e ha’u haree, mae nia esforsu an ,ha’u mós iha inan bainhira ha’u haree mae ne’e ha’u triste” negosiante ne’e espresa.
Negosiante ne’e nia mensajen,kuidadu sira be iha inan-aman sei moris no respeita sira, tan sira mak fó iis moris no sai Ai-mahon.
“Sira la hanoin atu han-hemu tanba hanoin nia oan sira nia futuru no oan sira nia presiza loron-kalan, ida ne’e mak ha’u rekomenda ba mãe, mãe forsa nafatin hodi kontinua faan sasan”dehan nia.
Faluk Feliciana Mendonça nia Oan Saturnino de Araujo bandu atu labele ba faan sasan iha dalan ninin tanba nia ama moras.
“Mae moras ha’u la hatan atu mae ba tur iha loron manas hodi fafan sasan maibe di’ak ida mae lao subar dala-ruma ha’u ba servisu (proyek) nian entaun mae mós aproveita ba faan sasan”
“di’ak ida tur iha uma dehan se mak atu fó osan, tanba ne’e mae sempre buka dalan hodi ba faan sasan”dehan nia.
Novidades Triste
Sidadaun Januario Soares, hakat ain atu halo apoiu nesesidade bázika ba Avó Feliciana maibé hafoin to’o ninia uma haree de’it mak Avó nia iis laek ona.
“Horikalan Ami promete atu ba hasoru mãe ida ne’ebé baibain faan Iha Rotunda Avó Xavier nia oin, ohin (Domingu) dader Ami ba halo asaun karidade iha kaikoli”
“Ami tula sasan ba to’o uma, haree hela tenda, ema barak, ami hanoin kal horikalan festa ruma, ami mós Ignora no to’o direita mãe ne’e nia uma, maibé dehan Mae hakotu ona is” Januário Soares espresa sentidu kondelensia.
Avó Feliciana nia oan mane Saturnino de Araujo espresa ho matan been bainhira Jornalista Loluwari vizita fila-fali lori ho ekipa Januario Soares hodi apoiu nesesidade bázika.
“Ha’u triste hela tanba horikalan mae is kotu ona maibé ha’u agradese tanba maun (jornalista Loluwari) mai uma husu tu’ir mãe nia kondisaun no ohin konsege lori Foos ho sasan mai, ha’u fó obrigadu barak ba imi nia laran luak” hatete nia.
Rio Soares nia mensajen sentidu solidariedade.
[Mãe Ida sempre hamriik ba nia oan sira nia moris di’ak hodi haluha Nia saude rasik…
Sinál ida ne’e mak oinsa oan sira sempre sente kontente bainhira mae iha Sira Nia sorin
Tanba ho Mae de’it Mak mundu ne’e sente hakmatek.
Ema hotu bele halo Barullu no Fila kotuk husik ó Maibé ó Nia mama Sei la husik ó
O hanesan oan ne’ebé hetan familia grasa Nakonu DEP mae ne’ebé sempre faan iha Rotunda Avo Xavier]
Ó sei sente mundu sai nakukun bainhira ó lakon inan-aman.
Jornalista : Cesar Pires
Editor:Herminio Cardoso