Loluwari Média (Díli) – Prezidente Repúblika (PR), José Ramos-Horta, hato’o sentidu kondolénsia ba família maktoban avó Maria Simão ho idade (76), ne’ebé hakototu iis horisehik lorokraik, iha tuku 17 liu minutu 30 oras Timor-Leste.
Durante Tinan rua ba kotuk 2023, Prezidente Repúblika, Jose Ramos-Horta, sempre, halo vizita ba familia ne’e hodi haree direita ba sira nia situasaun moris real.
Iha momentu ne’ebá prezidente hatudu nia kompromisu humanitáriu hodi orienta Ekipa Prezidénsia Apoiu Sosiál hodi konstrui haris-fatin ba sira, fó asisténsia bázika kada fulan no rekruta ema ida hodi tau matan hela ba sira na’in rua.
Madre Josefina Bakhita Soares de Araujo, FMDM ne’ebé durante ne’e tau matan mós ba família ne’e hato’o nia sentidu profundu ne’ebé liu husi iha mensajen:
“Avó nia mate iha orseik loraik oras 17:30, iis bo’ot akompaña nia tomak. No nia laiha vontade atu han no hemu, maski nia esforsu hela. Nune’e viziñu sira mak akompaña direta to’o nia iis kotu.” Hateten madre Josefina Bakhita
Avó Maria Simão mate ikus hafoin nia kaben ninia kaben mane Simão Maria ne’ebé foin mate iha fulan Marsu 2025 tina ne’e inklui nia oan nain rua ne’ebé fila sedu.
Tan ne’e,Prezidente Ramos-Horta, liu-husi Servisu Sosiedade Sivíl Prezidénsia Repúblika, kontinua fó susténsia morál no humanitáriu ba familia refere, hanesan parte husi Prezidente Ramos-Horta nia solidariedade ba povu babain iha sosiedade Timor-Leste.
Jornalista : Chay Risky