Loluwari Média (Dili) – Organizaun Jurídiku Sosiál (JU,S) promete sei asegura vítima estudante feto sira ne’ebé deskonfia dosente balu halo asédiu seksuál hodi livre intimidasaun prosesu estudu iha Universidade de Dili (UNDIL).
Advogadu JU,S Olivio Barros, deklara, JU,S esforsu hodi garante estudante sira bele kontinua iha prosesu estudu ne’ebé laiha intimidasaun.
“JU,S nia reprezentasaun legál inklui mós esforsu oi-oin hodi garante estudante sira bele kontinua estuda no sira sei la hetan intimidasaun ka konsekuénsia negativu tanba de’it sira uza sira-nia direitu atu fó-sai hahalok aat ne’ebe ema halo hasoru sira”
“JU,S sei fó asisténsia ba estudante vítima to’o prosesu ne’e remata, no prontu foti asaun saida de’it hasoru sese de’it ne’ebé viola estudante sira-nia direitu.”komunikadu Imprensa ne’ebé Loluwari.tl asesu iha pájina JU,S sesta-feira ne’e.
Tanba ne’e,JU,S apresia ba Reitór UNDIL ne’ebé bele loke prosesu dixiplinár hasoru onkum dosente ne’ebé deskonfia halo asédiu seksuál hasoru estudante feto sira iha kampus Universidade.
JU,S Jurídiku Sosiál mós hakarak rekoñese joven estudante sira-nia kbi’it, aten-berani no matenek ne’ebé hato’o sira-nia lian ne’ebé forte hodi hasoru injustisa sosial.
“JU,S fó parabéns ba Magnífiku Reitór Prof. Dr. José Agostinho da Costa Belo Pereira, ne’ebé foti ona desizaun atu loke prosesu dixiplinár hasoru ne’ebé sai alvu ba denúnsia asédiu seksuál husi estudante feto sira no fó ona suspensaun preventiva ba dosente refere”
JU,S Jurídiku Sosiál reprezenta estudante-vítima UNDIL sira iha kazu asédiu seksuál ida-ne’e,JU,S espera katak UNDIL, inklui Magnífiku Reitór, haree kazu ne’e nu’udar oportunidade atu hatudu ba sosiedade tomak.
“liu-liu komunidade akadémika no família husi estudante, katak UNDIL iha kompromisu atu garante ambiente seguru no responsabilizasaun ba sira-ne’ebé komete asédiu oinoin, inklui asédiu seksuál”sita komunikadu ne’e.
Alende ne’e,JU,S mós informa katak Ekipa Investigasaun hahú ona rekolla informasaun. JU,S fiar-metin katak membru hotuhotu hosi ekipa refere sei hatudu profisionalizmu no neutral, no sei garante konfidensialidade hosi prosesu tomak.
Tuir Lei Traballu, nu’udar rejime legál aplika ba dosente husi Universidade privadu, depois remata investigasaun tenke fó prazu loron 10 ba defeza traballadór.
JU,S fó hanoin ba Magnífiku Reitór katak presiza dunik halo prosesu ho lalais, maibé nafatin tenke garante prosesu sei tuir legalidade tomak mai husi Lei Traballu, no tuir Despaxu Ministeriál nú. 39/XI/MESCC/2024, ne’ebé Aprova Diretiva Sira Kona- ba Prevensaun no Kombate ba Asédiu Seksuál Iha Komunidade Akadémika.
JU,S hakarak rekoñese Magnífiku Reitor José Agstinho da Costa Belo Pereira nia kapasidade lideransa bainhira loke prosesu dixiplinár hasoru ninia dosente,JU,S espera katak Reitór sei mós iha kapasidade atu garante ambiente iha Universidade Dili sei la lori intimidasaun ba vítima no ba testemuña sira.
Iha realidade nasionál ne’ebé nakonu ho violénsia hasoru feto, keixa asédiu seksuál la hafoer naran instituisaun saida mak sei hafoer Universidade nia naran mak falta kapasidade hodi garante estudante sira-nia direitu, inklui proteje sira husi atake mai husi estudante seluk.
Jornalista : Cesar Pires
Editór : Herminio Cardoso