Loluwari Média (Dili) – Governu liuhusi Konsellu Ministru (KM) halo ona suspensaun temporária ba rekrutamentu ajente Polísia Nasionál Timor-Leste (PNTL) ne’ebé hamosu insatisfasaun ba kadetes sira.
Ministru Interiór, Francisco Guterres, rekoñese failla balu ne’ebé mosu iha prosesu rekrutamentu ba kadetes sira ne’ebé governu deside suspende temporária
“Ha’u nia mandatu failla tanba hansa ne’e,ha’u laos ko’alia faillansu lae,ida ne’e ita fó konfiansa ba instituisaun PNTL, ita hakarak fó ba sira para husik sira mak halo para labele iha polítika sira hatama (interven) liman ba laran”Dehan Ministru interior (MI), Francisco Guterres ba jornalista sira iha Palásiu do Governu, Tersa (11/02).
Purke, Ministru hatete, kuandu polítiku sira mak hatama liman tohar ba polísia para halo rekrutamentu maka polítiku sira hatama ninia ema iha laran hodi politiza instituisaun ida ne’e.
Maibé realidade akontese, Nia dehan, Tanba ne’e mak agora MI buka atu hadia, tenke halo tasak instituisaun ne’e, labele instituisaun ne’e dependente bebeik ba polítiku.
“Instituisaun ne’e instituisaun seguransa ne’ebé importante tebtebes entaun ita tenke buka hadia sira,(deskonfia PNTL) iha ida-rua nia hahalok ita tenke buka solusaun ba sira”
“Tenke aplika,ida ne’e mak ita halo para instituisaun ne’e fó konfiansa nafatin ba instituisaun ne’e rasik para futuru sira halo ho didi’ak ho responsabilidade kuandu konfiansa ne’e ita fó ona ba sira”dehan nia.
Tanba ne’e Ministru MI simu preokupasaun reklamante sira no lori kedas ba konsellu Ministru hodi deside temporária no loke komisaun foun hodi haree fila-fali prosesu tomak.
“Tanba ne’e mak ohin mai aprezenta ba Konsellu Ministru para deside katak,primeiru ita suspende tiha lai konkursu ne’e rasik tanba ita presiza halo uluk averiguasaun haree didi’ak fila-fali hafoin bele anúnsia fali rejultadu ne’e”
Tanba ne’e,konsellu Ministru deside halo re-estrutura fali komisaun verifikasaun no supervizaun,Komisaun ne’e kompostu husi entidade oioin inklui ema internasionál hanesan;
Polísia Australia, GNR, Ministériu Edukasaun ne’ebé fó prova kultura sei involve mós komisaun B PN,komisaun jerasaun patriota, veteranus,promosaun igualdade,jurista no seluk tan.
“Servisu fó ba sira (durante) loron 20, para atu halo revizaun tomak ba prosesu konkursu ne’e rasik,depois mak ita haree 20 dias sira rekomenda mai ha’u depois lori mai konsellu Ministru katak medida saida mak ita bele foti,halo revizaun totál see hetan problemas ruma ita bele halo revizaun totál ba ida ne’e ou bele mós ita bele dehan ,parsialmente (kansela) konkursu ne’e rasik”dehan nia.
Presiza re-teste ka lae? Ministru hatan,ne’e depende ba rekomendasaun husi komisaun entrega ba Ministériu Interior.
Signifika avansa nafatin 400 ka rihun 10 ne’e? Ministru hatete,Ida ne’e mak komisaun sei haree katak see iha irregularidade mak mosu makaas sira sei rekomenda atu haree.
Kona-ba Ministru rasik hatama nia subriñu no superior PNTL sira,ida ne’e mós iha ona investigasaun tanba komisaun sei haree hotu para MI bele foti desizaun.
Entrerantu tuir rezolusaun ne’ebé Konsellu Ministru aprova ona ba projetu Rezolusaun Governu nian, ne’ebé aprezenta husi Ministru Interiór, Francisco da Costa Guterres.
kona-ba suspensaun temporária no revizaun ba Konkursu Públiku ba Admisaun ba Kursu Formasaun ba Ajente sira Polísia Nasionál Timor-Leste (PNTL).
“Ho desizaun ne’e, Governu hakarak garante transparénsia, legalidade, no kredibilidade prosesu rekrutamentu nian, hodi konsidera dúvida no preokupasaun sira ne’ebé hato’o hosi kandidatu sira”sita komunikadu imprensa.
No entidade oioin kona-ba kumprimentu ba rekizitu balu no regularidade husi faze balu konkursu nian,iha sentidu ida ne’e, Rezolusaun Governu nian prevee suspensaun temporária ba konkursu no hametin mekanizmu fiskalizasaun nian.
Desizaun mandata mós re-estruturasaun hosi Komisaun Monitorizasaun no Fiskalizasaun nian, ho integrasaun husi elementu nasionál no internasionál independente sira.
No realizasaun husi revizaun exaustiva ida husi faze hotu-hotu husi konkursu, ho hanoin ba investigasaun tomak hosi faktu sira no adosaun eventuál husi medida koretiva sira.
Ho prosedimentu ida ne’e, Governu iha intensaun atu reforsa sidadaun sira-nia konfiansa ba instituisaun públika sira no garante katak asesu ba Polísia Nasionál Timor-Leste akontese tuir dalan ne’ebé justu, imparsiál, no tuir lei.
Entretantu kadetes ajente PNTL ne’ebé hamutuk na’in 400 okupa númeru kiik hodi hein atu tuir teste saúde no na’in rihun 10 ne’ebé mós liu maibé okupa iha númeru boot.
Jornalista : Cesar Pires
Editór : Herminio Cardoso