Loluwari Média (DILI)– MATAN-BEEN hahú maran neneik,maibé buat ne’ebé hela mak memória no eransa boot ne’ebé Lú-Olo husik ba jerasaun foun.Povu rihun ba rihun ne’ebé tanis ho lian ida de’it [Obrigadu barak, ba dedikasaun tomak, Deskansa ho dame iha Maromak nia futar oin].
Povu nia tanis ba saudozu Lú-Olo iha signifikadu ne’ebé kle’an tebes,povu sente Lú-Olo nia domin bainhira sei moris,povu tanis tanba sira lakon herói ida ne’ebé hatene loloos povu nia moris.
Iha dalan ninin labarik kiik eh boot,ferik-katuas tanis ho matan-been hodi fó onra no kontinénsia ikus ho saudades ne’ebé la hotu rai.
“Viva avó Lú-Olo…….viva Lú-Olo …….Lú-Olo iha ami nia fuan”povu tanis hodi fó adeus ikus.
Povu rihun ba rihun mak partisipa haloot saudozu nia isin mate iha semitériu herois da Pátria Metinaru,povu ki’ik sira sei laran-metin no saudades hodi konta hikas istória ho fuan-boot ne’ebé sira sente iha tempu saudozu sei ukun nu’udar Prezidente Repúblika [2017-2022].
“Uluk avó Lu-Olo ukun balun dehan nia la di’ak mais realidade nia mak di’ak liu”povu konta ba malu ho matan-been bainhira asiste haloot saudozu Lú-Olo isin mate.
Lú-Olo la’os de’it líder polítiku ida,maibé nia mak sasin moris husi funu naruk ba índependénsia,Lú-Olo koñesidu nu’udar líder ida ne’ebé laran-metin no la tuda fatuk subar liman.
Tanbasá Povu Tanis?
Lu-Olo la’ós de’it naran boot ida iha história maibé nia mós reprezenta buat barak ba povu timor-oan,nia moris tomak dedika ba rai ne’e, husi tempu nakukun funu nian to’o naroman ukun rasik an.
Iha istória naruk Timor-Leste nian, iha momentu barak ne’ebé nakaras no nakonu ho tentasaun atu rende, maibé Saudozu Lú-Olo hatudu ninia fidelidade ne’ebé total.
Nia la husik nia povu, nia la fa’an nia prinsipiu, no nia metin nafatin ba ukun rasik-an nian. Povu nia tanis mak dalan ida atu dehan: [Obrigadu barak ba grande erói ]
Haraik-An ne’ebé Labele Sura
Maski nia asume kargu nu’udar Prezidente Repúblika no Prezidente Partidu FRETILIN, povu haree Lu-Olo nu’udar figura ida ne’ebé “la foti-an”. Nia la husik nia kualidade nu’udar ema baibain. Povu ki’ik sira iha foho no bairo-bairo tanis tanba sira sente fasil tebes atu hakbesik ba nia; nia mak lider ida ne’ebé la kria distánsia ho nia povu.
Xefe Estadu Maiór Jenerál Falintil Forsa Defeza Timor-Leste (F-FDTL), Tenente Jenerál Domingos Raul “Falur Rate Laek” ho membru simu Kadavér antigu Prezidente Repúblika Timor-Leste saudozu Francisco Guterres Lú-Olo vizitaikus iha Kuartél Jerál Fatuhada Díli.FOTO (Cesar Pires).
Despede ikus
Lú-Olo lori ho iis laek hodi vizita nia kompaineiru da luta sira,instituisaun F-FDTL hodi husik espirítu kbi’it a luta kontinua.
Xefe Estadu Maiór Jenerál Falintil Forsa Defeza Timor-Leste (F-FDTL), Tenente Jenerál Domingos Raul “Falur Rate Laek” simu kadavér Saudozu nia vizita ikus iha Kuartél Jerál Fatuhada sai simbolu ba Forsa Defeza Timor-Leste (F-FDTL).
Falur hatete,F-FDTL despede ba aman saudozu nia luta libertasaun nasionál nian ho fuan ne’ebé todan maibé planu ne’ebé nakonu ho gratidaun.
“ha’u dirije ba ita hotu omenajen ikus husi figura no karakter kualidade lideransa nian ne’e dedika ho nia moris tomak ba liberdade no justisa ba Timor oan tomak” dehan Xefe Estadu Maiór Jenerál Falintil Forsa Defeza Timor-Leste (F-FDTL), Tenente Jenerál Domingos Raul “Falur Rate Laek” nia diskursu iha Kuartél General F-FDTL Fatuhada Díli, Sesta (26/06).
Xefe Estadu informa,Kamarada Saudozu Francisco Guterres Lú-Olo luta na’in nu’udar fiel ba kuadru Partidu FRETILIN nian no kuadru polítika ne’ebé lori FALINTILIN liu-husi Ai-laran, Foho lolon durantte tempu defisil iha tinan 24 nia laran.
“Iha prosesu tomak ita bo’ot nunka trai no nunka lakon esperansa ba ita nia povu ne’ebé luta loron ba loron hodi diknifika ba sira no ba sira nia família rejiste no preziste sempre sai ita boot nia Jornada moris”
“hafoin konkista ita nia liberdade bainhira tempo ona ita bo’ot deskansa ita-boot hasoru luta foun ne’ebé diferente no defisil Irmão no kompaineiru da luta,Ita bo’ot ba ho dame tamba moris ho prinsípiu no valores asuwain lolos Falintil nian”
Xefe estadu hato’o mensajen ida ba Forsa Defeza Timor-Leste, Lider Politika kamada sosiál no sosiedade hotu atu promove diálogu harii unidade nasionál ho espiritu respeita ba malu.
“despedida fahe ita maibé loke mós ita nia fuan katak ema moris iha mundu ne’e ho misaun mai atu servi no hadomi to’o ita fila hikas ba rai ne’ebé ita hotu ba Saudozu Francisco Guterres Lú-Olo fila uluk ona.”
Falur husu ba família atu hamaran matan-been no orgullu ho misaun nobre legadu ne’ebé saudozu husik hela ba Timor,Falintil-F-FDTL agradese no Valoriza Saudozu Francisco Guterres Lú-Olo.
“Ami promete sei tau matan ba Timor nia independénsia,soberania no Integridade,no ami mós sei tau matan ba família ne’ebé ita husik hela. Adeus,,,, Adeus,,,,Adeus Irmão”
Iha parte seluk,Ministru Defeza (MD), Kontra Almirante Donanciano Costa Gomes “Pedro Klamar Fuik” Dehan,tristeza kontestasaun boot povu tomak simu realidade moruk bainhira Saudozu Francisco Guterres Lú-Olo husik hela povu hotu-hotu.
“Ita nia Saudozu Francisco Guterres Lú-Olo hanesan antigu prezidente Repúblika Timor-Leste nian ne’ebé dedika nia an tomak hanesan servidór maibé iha momentu ida ne’e nakonu ho moras no lutu”
Nia haktuir,istória sei sai lembransa hanesan priviléjiu iha funu to’o Timor-Leste hetan nia independénsia livre ho nia soberania.
“Ami nia obrigadu ba maun Lú-Olo ate sempre “A sua Memória os nossos Cpração de Timor-Leste Adeus,,,,Adeus,,,,, Adeus”
Lia-menon husi Familia
Espoza saudozu Francisco Guterres Lú-Olo ho nia oan nain-haat.FOTO (Cesar Pires).
Reprezenta Maktoban Domingos Guterres lori Família Maktoban hakruk no fó agradese tebes ba parte hotu-hotu nia Kontribuisaun no dedikasaun tomak durante Maktoban fila hikas mai Timor-Leste ho nia funebre tomak.
“Ha’u lori família Saudozu nian naran husu mós agradese ba Povu Doben Timor-Leste no Povu Ai-leba oan sira, Nonu Governu, Instituisaun PNTL no F-FDTL no mós ba Média sira iha Timor-Leste ne’ebé mós halo kobertura durante Maktoban nia funebre semana ida tomak”dehan nia
Nia dehan,família husu deskula ba povu doben Timor-Leste karik durante moris suadozu Lú-Olo halo sala hasoru imi karik, se karik iha politika nia halo buat ruma la los karik ha’u lori família nia naran ami hakruk no husu Deskulpa.”
Família husu mós ba Partidu FRETILIN tempu ona para atu pasiénsia no tenke hatudu Saudozu Francisco Guterres Lú-Olo sai exemplar ba lider sira hotu-hotu tanba Saudozu buka mak amizade di’ak liu amigu duni buka inimigu.
“Tempu ona para ita hadia sistema ida ne’ebé diak,ha’u husu ba povo doben Timor-Leste iha seremonia Maktoban nian povu hotu-hotu tristeza tanba Saudozu ema ida ne’ebé simples la haree ba kor no rasa maibé saudozu haree ema hanesan Timor oan.”
Saudozu Francisco Guterres Lú-Olo nia loron kala to’o ona Adeus,,,,Adeus,,,,Adeud maun Adeus,,,adeus,,,Timor no adeus,,,adeus ba povu doben Timor-Leste.
Sekretáriu Jerál Partidu FRETILIN Mari Bin Amudi Alkatiri hatete, Kamarada no Slsaudozu Francisco Guterres Lú-Olo fízikamente nia lakan ona husi povu Timor-Leste maibé nia espiritu sei hamutuk ho povu doben Timor-Leste.
“Ohin ita lori Saudozu Francisco Guterres Lú-Olo mai haloot maibé nia espiritu sei nafatin ho ita, ha’u husu ba Mana Sidalia ho nia oan sira, Saudozu nia fízikamente mak lakon maibé nia espiritu sei nafatin hela ho ita ami mós sei tau matan nafatin ba ita”dehan Mari.
Sekretáriu Geral lori família no Partidu FRETILIN nia naran hato’o obrigadu ba Nonu governu konstitusional nia apoiu mai Saudozu nia seremonia ate funebre ikus iha Semitériu herois da Pátria Metinaru.
Jornalista : Cesar Pires
Editór : Herminio Cardoso