Loluwari Média (Díli) – Defisiente fiziku, Gabriel de Olivereira, hatete, maske ho kondisaun Defisiensia la sai obstaklu ba Gabriel hein oras ualu nia laran hakarak haree Amo Papa nia oin no simu Amo Papa nia bensaun.
“Ha’u mai desde tuku ualu dader hodi mai tuur iha dalan, husi diresaun Fatuhada nian atu mai simu Amu Papa, no ha’u iha ne’e konta oras ualu, no ohin ha’u konsege haree no simu duni bensaun husi Amo Papa. Ha’u la sente kole no hamlaha tanba ha’u hakarak atu hetan de’it Amu Papa nia oin no bensaun tanba ne’e mak desde ohin ha’u mai iha ne’e ha’u mantein iha ne’e. Ida ne’e orgullu ida ba ha’u nu’udar sarani.” Dehan Defisiente, Gabriel de Olivereira, ba jornalista sira hafoin simu Papa Francisco nia vizita iha Fatuhada Dili, segunda (09/08).
Gabriel hatete, nu’udar sarani katolika maske loron manas no kondisaun Defisiente maibé ho antusiazmu hodi hein atu simu bensaun husi Amu Papa Francisco tanba sei la mai dala rua.
“Ha’u nu’udar ema Katóliku la hatene kole la hatene loron manas maske ha’u ho kondisaun Defisiente maibé ha’u la lakon esperansa atu mai tuur iha estrada hodi hein ita nia Sua Santidade Amu Papa. ha’u sente kontente tanba Santo Padre bele mai sama iha ita nia rai Timor-Leste, Ha’u orgullu ho vizita ida ne’e tanba hanesan sarani asiste haree ho matan iha ha’u nia moris tomak.”
Vizita ida ne’e halo istória bo’ot ba Timor-Leste, liliu mai hanesan jerasaun foun ne’e orgullu tebes.
“Maske ha’u moris ho kondisaun defisiente, maibé ha’u lakohi hela iha uma hodi nonton husi televizaun de’it, ha’u hakarak mai direita iha ne’e hamutuk ho ita nia inan-aman, labarik feto no mane ferik no katuas, tanba Amu Papa João Paulo II uluk mós hala’o nia vizita mai iha ita nia rai iha tinan 1989, maibé ne’e ha’u nia inan- aman mak konta mai ha’u de’it ohin loron ha’u hakarak partisipa iha vizita ne’e hanesan sarani, maske loron manas, maibé ami sente hanesan malirin hela no hakarak atu haree Amu Papa nia Vizita ida nee.”
Jornalista : Chay Risky
Editór : Ilima’a