Loluwari Media (Díli) – Inan Teodora Sarmento, agradese ba Maromak tanba bele hasoru Amu Papa Francisco ne’ebé vizita Timor-Leste, espesial ba konventu Madre Alma hodi fo bensaun ba nia oan ne’ebé ho kondisaun Defisiente atu simu bensaun husi Amu Papa Francisco nune’e nia sente kontente no hamonu matan been.
“Ha’u kontente teb-tebes no agradese wa’in ba Aman Maromak, tanba Amu Papa mai ne’e atu fo bensaun ba ha’u nia oan ne’e atu hetan isin diak, hanesan ha’u nia oan sira seluk.” Dehan Teodora Sarmento, ba loluwari.com iha konventu, Madre Alma, Praia dos Coquerois, Dili, tersa (10/09).
Teodora haktu’ir, bainhira moris mai nia oan kondisaun normal maibé to’o ikus hetan moras vestidu Mutin fulan 9 mak sai ona difisiente.
“Ha’u hamonu matan been tanba ita la espera, hanesan mehi sai realidade, katak ita nia amu papa horseik to’o ona iha ita nia rai nune’e ohin dader tuku 6 ami mai iha ne’e ona hein amu papa mai atu tula liman ba ha’u nia oan ne’e ha’u kontente tebes ona atu nune’e ha’u nia oan bele rekopera fila-fali hanesan ho nia alin sira.”
Durante ne’e nia oan ho kondisaun maibé tanba hetan moras vestidu mutin mak halo labarik nia kondisaun la normal. Hanesan nia alin sira seluk tanba nia oan feto dahuluk kondisaun moras nia sente triste tebes nia hakarak hetan bensaun husi amu Papa atu hetan saude diak.
“Ha’u iha esperansa bo’ot ba amu Papa nia prezensa mai iha Timor-Leste no fo bensaun ba ita, sarani sira hotu liliu ba ha’u nia oan ne’ebé ho kondisaun defisiente ne’e atu bele rekopera fali hanesan nia alin sira.”
Jornalista : Chay Risky
Editór : Ilima’a