Loluwari Média (Díli) – Agustinho Soares Baptista, sente orgullu no agradese hodi hamonu matan ben tanba amu papa bele tula liman ba nia oan feto Misela Baptista hodi simu Bensaun atu nune’e nia oan bele rekopera fila-fali.
“Ha’u sente kontente tebes ho ha’u tanis, ha’u tanis la’os tan buat seluk maibé tanba ha’u nia oan hetan bensaun husi Amu papa, tanba tula liman ba ha’u nia oan hodi oferese mos tersu ida ba ha’u nia oan, ha’u espera katak ho bensaun ne’e ha’u nia oan bele rekopera fila-fali.” Dehan Agostinho Soares Baptista, ba loluwari.com iha konventu Madre Alma Praia dos Coqueros, Dili, tersa (10/09).
Agustinho, Sente orgullu ho presenja Amu Papa Francisco mai Timor-Leste, fo bensaun ba nia oan ne’ebé ho kondisaun Defisiente iha ulun.
“Ita nia rai, rai ida ne’ebé lulik tebes Maromak iha ne’e duni Maromak nia hun no domin iha ne’e duni tanba ne’e mak ha’u husu ba aman Maromak akompaña no fo grasa wa’in ba ha’u nia oan no fo forsa matenek ba nia, tanba ami durante ne’e esforsu makaas, no ami nia konfiansa bo’ot ba Maromak atu nune’e ha’u nia oan nia kondisaun bele rekopera.”
Nia hamonu matanben tanba uniku primeira vez iha nia moris no nia familia, tanba durante ne’e sira halo devosaun no orasaun no ohin loron marka historia ba nia loron 10/09/2024 Maromak mai duni iha rai ida ne’e.
“Husi ne’e ha’u espresa hamonu matanben ba Maromak, katak amu papa fo ona bensaun mai ha’u nia oan, maske ho kondisaun ne’ebé la hanesan ho ema seluk maibé ho amu papa ne’ebé ho fuan bo’ot fuan Maromak mai to’o iha fatin ida ne’e no tula liman ba ha’u nia oan.”
“Ha’u nia fiar ba Maromak pursentu 100 (100%) liuhusi amu papa nia bensaun ha’u nia oan nia kondisaun bele rekopera fila-fali, tanba ha’u nia fiar laiha limitasaun ba Maromak.”
Agostinho nia kaben Febiana da Costa, nu’udar inan sente kontente tebes tanba durante ne’e sira esforsu makaas ba labarik nia kondisaun fiziku, hodi halo tu’ir liuhusi kultura no buka aimoruk tradisional hodi kura maibe seidauk diak.
“Ohin ha’u ho ha’u nia oan ho nia apa ami hamonu matanben tanba amu papa nia bensaun direita, mai ami ha’u espera katak ho bensaun ne’e ha’u nia oan bele hetan saude diak fali tanba ami haree ami nia oan nia kondisaun ne’e diak fiziku diak ho nia ulun de’it mak bo’ot ne’e ohin hetan ona bensaun husi ita nia Santidade, Amu Papa, ami sei akompaña ho orasaun atu nune’e ami nia oan bele diak fila-fali.”
Jornalista : Chay Risky
Editór : Ilima’a