Loluwari Média (Dili) – diretóra diresaun nasional regulasaun komersial no protesaun konsumidores, Manuela da Silva Tilman, informa, presu nesesidade baziku durante natal no tinan foun la’o normal.
“Relasiona ho loron bo’ot ida ne’e, MCI liuhusi diresaun nasional regulasaun komersial ne’ebé tutela ba diresaun jeral komersiu hakarak relata ba publiku katak lalika hakfodak kona-ba folin sasan iha merkaduria. Tanba tu’ir MCI nia observasaun katak sasan agora dadaun folin sei normal to’o loron bo’ot liu, liliu nesesidade baziku.” Dehan diretóra diresaun nasional regulasaun komersial no protesaun konsumidores, Manuela da Silva Tilman, ba jornalista sira, iha nia servisu fatin, Bebora, Dili, segunda (23/12).
Nia relata presu fos husi distributor Perisos mak fos husi India ho marka Amor de Familia 20 Kg, ho presu $ 12.25, no 25 Kg ho presu $ 15,50, fos husi Thailandia ho marka gostu los, 20 Kg ho presu $ 12.75 no 25 Kg ho presu $ 16.00, fos husi Vietnam homarka Folsom 20 Kg ho presu $ 18,00, fos husi Cina ho marka manu Vitoria 20 Kg ho presu $12.75 no 25 Kg ho presu $16.00, fos husi India ho marka sahur do Amor 25 Kg ho presu $ 15,25, no Beruang Merah 25 Kg ho presu $ 16,25, fos husi Pakistaun ho marka Columbus 25 Kg ho presu $ 15.75.
Nia afirma, daudaun ne’e fos iha armajen distributor Perisos hamutuk rihun 20 toneladas no ró tolu mak daudaun ne’e sei tama tan mai. diretór kompaña Perisos informa iha janeiru 2025 nia laran fos ne’ebé ho nutriisaun aas no saudavel ba labarik sira ho marka LABARIK MATENEK sei tama tan toneladas 540, husi India.
Masin midar mai husi India kada sakas 50 Kg daudaun presu tun husi $ 40 ba 37 to’o 33. Masmidar 5 kg faan ho presu $ 4,50, 3 Kg faan ho presu $1.50 no 1 Kg faan ho presu $ 1.00.
Mina kuziña kompostu husi Bimoli 5litru kaixa ida ho presu $ 26.50 faan jergen ida ho presu $ 7.50, mina ho marka kolumbus 4.3 litru kaixa ida faan ho presu $ 23.50 jergen ida faan ho presu $ 6.50, mina ho marka gostu los 4.5 litru kada kaixa $ 25.00 jergen ida ho presu $ 6.50, mina ho marka Sania 2 litru kada kaixa ho presu $ 17.00 masa ida presu faan ba $3.00-$3.50, Mina Bimoli 2 litru kaixa ida faan ho presu normal $17.00, masa ida faan ba presu normal ho presu $ 3.25 – $ 3.50.
Enkuantu presu manu tolu iha merkadu kaixa ida kategoria A ho presu $ 59.00 kada rak ida faan ho presu normal $5.50, kategoria B $ 56.00 kaixa ida faan ho presu $ 4.50, kategoria C faan ho presu normal $ 53.00 faan ho presu $ 3.75, katgegoria D kaixa ida $ 45 rak ida faan ho presu normal $3.50.
Terigu ho marka tali biru kada sakas 25 Kg ho presu $16.35, terigu ho marka tali biru kada sakas 25 Kg ho presu $ 16.75, terigu ho marka Folsom kada sakas 25 Kg ho presu $ 15.75, terigu ho marka Kompas 1Kg kada kaixa ho presu $ 7.50 kada kilo ho presu $ 0.95-$ 1.00, terigu ho marka Bola salju 1 Kg kada kaixa ho presu $ 7.50 kada kilo ho presu $ 0.95- $ 1.00
Supermie ho Mie Sedaap soto kada kaixa ho presu $ 6.70, Mie Sedaap goreng kada kaixa faan ho presu $ 7.10, Mie Sedaap Koreia faan kada saka ho presu $ 7.10.
Diresaun nasional regulasaun komersial liuhusi ministeriu komersiu industria hakarak relata ba publiku katak komesa husi fulan outubru to’o agora folin ba nesesidade baziku la’o normal hahu husi Dili to’o 13 munisipiu, se karik mak kompañia balu mak sei halimar ho folin sasan liliu ba nesesidade baziku halo favour konsumidor sira bele mai apresenta iha ministeriu komersiu instria liuhusi diresaun nasional regulasaun komersial e protesaun konsumidores.
Vise ministru komersiu Industria, Augusto Junior Trindade, afirma, stok nesesidade baziku atu hasoru loron bo’ot natal no tinan foun sufisiente no presu normal iha teritoriu nasional.
“Ohin ita halo tarde uitoan maibé atu hasoru loron bo’ot ida ne’e, ita iha stok ida ne’ebé sufisiente ho presu ida ne’ebé apresenta ona.”
“Ita hotu preokupa hala’o loron bo’ot ida ne’e loja sira ne’ebé ami halo ona monitorizasaun, diretóra regulasaun komersiu foin fila husi Oe-Cusse hodi haree presu sira tu’ir mak apresenta loron hira ne’e ba Viqueque, presu kuaze tu’ir saida mak apresenta kios ida rua mak presu ne’e iha nivel standar ne’e maibé koko atu ko’alia ho loja na’in atu harmoniza tiha presu, nune’e bele sai standar ba ema hotu.
“Ami nafatin akompaña prosesu sira ne’ebé iha teritoriu laran ikus star sira ne’ebé spalla iha munisipiu sira.
Jornalista : Chay Risky