Loluwari Média (Díli) – Komandu Jerál Polísia Nasionál Timor-Leste (PNTL), Komisariu Jerál, Henrique da Costa, hatete, PNTL sei komemora nia aniversariu ba dala 25 iha 27 fevereiru tinan ne’e ho animasaun liuhusi Desportu. Maske idade atinji ona tinan 25 maibé instituisaun seguransa ne’e sei menus infra-estrutura liliu edifisiu propriu ba komandu munisipiu sira.
“Iha tinan 25 existensia PNTL, hetan dezafiu husi infra-estrutura Instutisaun PNTL nian liliu ekipamentus nomos menus rekursu humanu.” Dehan Komandu Jerál PNTL, Komisariu Jerál, Henrique da Costa, ba jornalista sira iha kuartel General PNTL, Kaikoli, Dili, Segunda (03/02).
Komisariu esplika, Instutisaun PNTL hamri’ik nu’udar mane klosan ida ona maske nune’e sei falta ekipamentus nomos rekursu humanu.
“Ita nia infra-estrutura husi Instituisaun PNTL nian, liu-liu ita nia Kuartel Jeneral PNTL hahu husi inisiu PNTL hamri’ik to’o ohin loron seidauk iha komandu Jeral ne’ebé diak nomos komandu Munisípiu sira nia fatin ne’ebé dignu ba ita nia membru sira atu hala’o nia kna’ar mos seidauk nomos eskuadra sira mos seidauk inklui Postu Fronteira sira nian.”
Superior ne’e subliña maske komandu koloka ona membru Ofisiál Polisia Suku (OPS) maibé seidauk iha fatin diak atu membru sira utiliza hodi hala’o nia kna’ar tanba ne’e mak OPS nia servisu iha suku sira ladauk maximu.
“Ami mos menus ekipamentus tanba ekipamentus hanesan fator importante ba ami nia servisu liu komunikasaun hanesan radio nomos liña Internet tanba liña Internet ho radio komunikasaun importante tebes ba ami nia membru sira atu halo liña koordenasaun liliu iha area remotas nomos iha fronteira.”
PNTL mos menus fasilidade servisu hanesan transporte tanba servisu PNTL sempre utiliza transporte atu halo atendementu ba publiku nune’e presiza transporte ne’ebé diak atu servisu nomos transporte ba iha operasaun iha Munisípiu sira mos menus tebes sai hanesan dezafiu bo’ot ba PNTL atu hala’o servisu.
“Ita nia numeru efetivu membru PNTL hamutuk 4 mill 4 ne’ebé membru balu moras, balu koloka ba Migrasaun balu ba Eskoltu ba Alta entidades, balu iha Fronteira no balu tu’ir formasaun iha rai liur. Tanba ne’e mak ita nia numeru atendimentu ba publiku ne’e menus.”
Komisariu Jerál mos husu Ministeriu Interiór atu halo rekrutamentu ba kadetes foun iha tinan ne’e hodi nune’e bele haforsa ba Instutisaun PNTL aumenta efetivu hodi hala’o atendimentu ba publiku ho diak.
Jornalista : Chay Risky