Loluwari Média (Díli) – Diretór Rotary Youth Leadership Awards Timor Lorosa’e (RYLATL), Octavio da Silva Monteiro, hatete, tinan 16 RYLATL existensia iha TL ho timor oan ne’ebé servisu voluntariu makaas ba preparasaun lideransa ba Timor-Leste.
Ami nia konferénsia sei realiza iha Sentru Tibar no ami sei la’o programa doasaun ran ba ami nia membru sira hodi ajuda ita nia Hospital Nasionál Guido Valadares (HNGV) hodi fo apoiu ba ita nia maluk timor ne’ebé moras no presiza ran iha Hospital.” Dehan Diretór Rotary Youth Leadership Awards Timor Lorosa’e (RYLATL),Octavio da Silva Monteiro, ba jornalista sira, iha Palasiu Prezidensial, Nicolau Lobato, Bairro-Pité, Dili, sexta (07/03).
“Ami sente previllezu bo’ot ba sua Exelénsia Prezidente Repúblika (PR), José Ramos-Horta, tanba ohin ami bele enkontru hamutuk hanesan jerasaun foun ami presiza apoiu no moral husi Prezidente Repúblika no governu nune’e ami bele prepara juventude sira ho diak ba futuru.”
Nia hatete, RYLATL nia programa prioridade atu prepara juventude sira ba futuru no mos atu hadomi ambiente inklui donor ran hodi salva ema seluk nia vida.
“Durante ami nia ezistensia, ami halo konferénsia no ami prepara ba no formasaun ba juventude sira no ami servisu hamutuk ho komunidade sira iha 13 munisípiu inklui Regiaun Administrativa Espesial Oe-Cussi Ambeno (RAEOA), no fahe informasaun ba komunidade sira no ami fo apoiu humanitaria ba ema ho kbi’it laek sira.”
Iha 2020 Covid-19 tama, TL RYLATL iha inisiativa lori sasan no hahan ba ema ne’ebé hela iha kos tanba menus hahan no sira mos sira halo programa estagiu programa professional atu aumenta sira nia kuñesimentu ba vida professional.
“Agora daudaun ami halo parseria ho Organizasaun Naun -Governamental Internasionál nomós governu atu haruka ita nia juventude sira ba rai liur hodi aprende no ami halo programa ida maka kail ba dame ne’e kada tinan RYLATL sempre realiza atu bele halo lasu amizade entre parseria ho juvenil nomos ami promove atu ema hotu iha konsensia kuidadu ita nia ambiente.”
Alende ne’e RYLATL mos iha programa seluk mak realiza desportu tanba ne’e importante tebes ba juventude sira, tanba desportu nia benefisiu entre ema nia saúde no halo amizade entre organizasaun juvenil sira iha Timor-Leste.
“PR fo nia mensagen ba RYLATL mak husu ba juventude sira atu estuda makaas liliu ba area ne’ebé importante hodi kontribui ba Timor-Leste ba futuru atu kuidadu ambiente no presiza kuda ai no kuidadu bee matan sira iha TL. Daudaun ne’e RYLATLnia membru iha munisípiu hamutuk rihun ida resin.
Jornalista : Chay Risky