Loluwari Média (Díli) – Embaxadora Xina, Wang Wenli, informa, governu Xina aprova ona kooperasaun ho governu Timor-Leste atu hari’i hospital militar no tempu bada sei loke tender ba publiku atu hahu konstrusaun.
Embaixadora Xina, Wang Wenli, afirma, governu Xina aprova ona kooperasaun ho governu Timor-Leste atu hari’i hospital militar andar ualu (8) to’o sanulu (10).
“Governu Xina ho governu Timor-Leste ko’alia tiha ona kona-ba atu hari’i hospital Militár no ba ita nia veterenus inklui funsinariu no komunidade sira. Kona-ba hospital ita hetan ona aprovasaun husi governu Xina.” Dehan Embaixadora Xina, Wang Wenli, ba jornalista sira, iha kuartel General, F-FDTL, Fatuhada, Dili, tersa (18/03).
Wenli hatete, tempu badak governu Xina sei loke konkursu ba konstrusaun ida ne’e nune’e empreza bele hahu servisu.
“Tu’ir mai ami sei loke tender ba kompania konstrusaun sira hodi realiza obra ida ne’e.”
Ministru defeza Kontra Almirante, Donaciano Costa Gomes “Pedro Klamar Fuik” hatete, adidu defeza Xina lori ona karta ba nia atu finaliza prosesu konstrusaun Hospital Milita refere.
“Ohin Adidu Defeza Xina lori karta ida mai ha’u atu finaliza ba prosesu Hospital Militár nian ne’e, tanba ne’e mak Xineza iha Beijin haree ona katak konforme saida mak ami diskute hamutuk no atu organiza bainhira mak atu halo lansamentu ba primeira Pedra.” Ministru Defeza afirma.
Governante ne’e afirma, Beijin fo atensaun atu hari’i Hospital Militár iha Timor-Leste, hospital ne’e sei to’o andar sanulu (10). Tanba situasaun ne’ebé Timor-Leste enfrenta ho nia nesesidade presiza responde ba Militár no sivil enfrenta.
“Governu Xineza fo ba ita doasaun atu hari’i Hospital Militár andar 8 to’o 10 ho kama ne’ebé pasiente sira atu utiliza ne’e hamutuk atus ida resin ho nia dimensaun hanesan ho Hospital Nasionál Guido Valadares (HNGV). Tanba ne’e mak dezeñu ne’ebé sira propoin mai ita bainhira ita konkorda mak ita sei haree parte prosesu preparasaun nian.”
Ministeriu Defeza ho governu Xineza sei hamutuk hari’i komisaun atu prepara instalasaun ba Hospital Militár no forma Doutor no Enfermeira sira inklui tékniku sira atu utiliza makina ne’ebé sei koloka ba Hospital Militár.
Hospital Militár ne’e ho Hospital modernu ne’e kampu helicopter nian iha leten no Rejidensia ba Mediku no Infermeiru sira no ba tekniku sira bele hela besik iha Hospital Militár ne’e atu halo operasional ba Hospital Militár ne’e ho emerzénsia 24 oras iha kualker altura atu sustenta ba ai-moruk sira.
Hospital Militár modernu signifika iha sistema digitalizadu ne’ebé mak diak koresponde ba objetivu ne’ebé mak define tanba Hospital Militár atu serve ba Militár ho nia familia ba Polísia ho sira nia familia ba veteranus ho sira nia familia no ba funsinariu sira ho sira nia familia inklui mos ba povu hotu.
Jornalista : Chay Risky