Loluwari Média (Díli) – Komandu Munisípiu Díli (KMD), Superintendente Xefe Polísia, Orlando Gomes, hatete, kazu dezentendimentu iha Diresaun Nasionál Transporte Tereste (DNTT) membru Polísia Nasionál Timor-Leste (PNTL) sei hetan sansaun Disipliñar.
“Ita hotu rona no akompaña ita nia membru PNTL husi Diresaun Tranzitu Seguransa Rodaviaria Munisípiu Díli, ne’ebé halo tratamentu dokumentus iha DNTT Balide iha akontesimentu sidadaun sira dudu malu hodi hamosu dezentendimentu ita nia sidadaun ho ita nia membru Polísia Tranzitu ne’ebé nia video viral loos iha Media Sosial.” Dehan Komandu Munisípiu Díli (KMD), Superintendente Xefe Polísia, Orlando Gomes, ba jornalista sira, iha Eskuadra Dom Aleixo Ai-Mutin Dili, kuarta (19/03).
Gomes hatete, Komandu sei hein relatóriu ne’e saida mak akontese loloos iha terenu. Bainhira membru komete erru ruma hasoru sidadaun sira hodi kontra regras Disipliñar sira mak Komandu sei foti medidas hodi fo sansaun ba membru refere.
“Ita nia membru tranzitu ne’e dala ruma la tu’ir ona liña formatura hodi hakat liu formatura tanba ne’e ita nia sidadaun sira la simu hodi hamosu dezentendimentu iha fatin refere.”
KMD haruka Xefe Tranzitu Munisípiu Díli atu halo identifikasaun ba membru refere atu bele hatene akontesimentu ne’ebé akontese iha DNTT.
“Bainhira ita nia sidadaun ne’ebé la satisfas ho akontesimentu ne’e bele mai halo keixa atu nune’e ita bele halo prosesa ba membru refere tanba hatudu hahalok ne’ebé ladun diak ba ita nia sidadaun sira nia leet. Tanba ne’e mak ha’u bolu ona membru refere atu halo investigasaun ba nia.”
Membru PNTL dader sempre halo formatura dader, molok atu ba servisu iha terenu sempre hetan orientasaun husi komandu atu halo servisu hotu tu’ir lei no regras.
“Bainhira ita nia membru sira ne’ebé la halo tu’ir lei no uza sira nia podér atu halo asaun ruma mak Komandu sei halo medidas hasoru membru refere.”
Jornalista : Chay Risky