Loluwari Média (Díli) – Komandu Munisípiu Díli (KMD), Superintendente Xefe Polísia, Orlando Gomes, informa, kazu asidente fatal ne’ebé akontese iha area Fomentu postu administrativu Dom Aleixo munisípiu Díli, iha loja funan Buras nia oin, Polísia Nasionál Timor-Leste (PNTL) Komandu Munisípiu Díli asegura ona suspeitu ba sela detensaun oras 72.
“Iha asidente ne’e ita nia sidadaun feto ida ne’ebé hakat hela zebra Kross no motorizada halai ho velosidade makaas hodi soke ita nia sidadaun feto ne’e hetan kanek iha parte Ulun, tilun no ain rua ne’e hotu.” Dehan Komandu Munisípiu Díli (KMD), Superintendente Xefe Polísia, Orlando Gomes, ba jornalista sira, iha Eskuadra Dom Aleixo Ai-Mutin, Dili, kuarta (19/03).
Gomes relata, suspeitu ho inisial MSC soke vitima iha Fomentu ne’e laiha karta kondusaun ho idade 17 ne’ebé kumpri ona 72 oras hein desizaun husi Tribunal.
“Iha akontesimentu nee, ita nia patrullamentu KMD ho ita nia Polísia unidade tranzitu Dili ho rapidamente to’o kedas iha fatin akontesimentu hodi evakua vitima ba hospital Nasionál Guido Valadares (HNGV) atu halo tratamentu saúde maibé to’o iha Sala Emerzénsia, vitima la konsege salva no hakotu iis.”
Vitima nia mate isin lori kedas ba sala mortuariu hodi entrega ba nia familia, enkuantu PNTL detein suspeitu bas ala detensaun durante oras 72, no halo prosesu hodi entrega ba Ministeriu Publiku (MP).
“Evidensia motorizada ita asegura ona iha KMD nune’e ita kontinua prosesu kazu ne’e ba oin.”
Relasiona ho asidente fatal ida ne’e familia vitima halo kedas keixa ba KMD inklui ba Transitu atu nune’e prosesu ne’e kontinua.
“Kazu ba tribunal sei iha prosesu nia laran no ita sei rona desizaun ikus ba asidente fatal ida ne’e, ita nia vitima ho naran Juzelma Gonçalves, no suspeitu ho Inisial MSC.”
Jornalista : Chay Risky