Loluwari Média (Díli) – Direitór Diresaun Tranzitu Seguransa Rodaviariu (DTSR), Superintendente Asistente Polísia, Luis da Costa, Informa, kazu asidente fatal ne’ebé akontese iha area Fomentu loja Funan buaras nia oin hodi halakon sidadaun Timor oan nia vida ne’e desizaun Tribunal, la’os desizaun Polísia Nasionál Timor-Leste (PNTL).
“Servisu Polísia Nasionál Timor-Leste (PNTL) liuhusi unidade Polísia Tranzitu ne’ebé hala’o nia kna’ar tu’ir lei ne’ebé preve, tanba antes asidente fatal ne’e akontese hafoin polísia tranzitu ba kedas iha fatin akontesimentu hodi sukat sena ba asidente ne’e no ami rekolla evidensia ne’ebé iha terenu hodi halo prosesu tu’ir lei”. Dehan Direitór Diresaun tranzitu Seguransa Rodaviariu (DTSR), Superintendente asistente Polísia, Luis da Costa, ba jornalista sira, iha kuartel Jerál PNTL, Kaikoli, Dili, tersa (01/04).
Nia hatete, informasaun ne’ebé komandante Tranzitu ne’e hetan husi komandante seksaun tranzitu Munisípiu Díli, suspeitu Polísia konsege detein oras 72 hafoin liberta fali.
“Tu’ir prosesu normal ami hala’o ne’e tu’ir regras ne’ebé iha mak kodigu prosesu penal ne’ebé fo kompeténsia ba PNTL, maibé desizaun ne’e husi Tribunal no kompeténsia husi Tribunal nian maibé teknikamente dadus ne’ebé Polísia hato’o ba Ministeriu Publiku (MP) ne’e signifika tu’ir duni asidente fatal ne’ebé akontese.”
Bainhira desizaun to’o iha Tribunal Polísia labele to’o iha ne’eba, tanba ne’e mak polísia hato’o ba publiku katak asidente fatal ne’ebé akontese, polísia tranzitu komandu munisípiu Díli, hala’o nia prosesu normal bazeia ba regra.
“Informasaun familia vitima ne’ebé fo sai, dehan ami mak sasin ne’e ne’e la loos tanba antes asidente fatal ne’e akontese laiha polísia ida mak hamri’ik hodi haree ho matan maibé depois asidente ne’e mosu ami nia prezensa iha ne’e ba atu hala’o ami nia servisu hanesan tranzitu seguransa rodaviaria nian hodi rekolla no sukat asidente fatal ne’e nia motivu.
Tanba ne’e mak ami husu ba Familia vitima keta entende sala dehan Polísia mak sai sasin ne’e la’e ami nia prezensa atu servisu tuir ami nian no ami la’os sai sasin.”
Polísia nia prezensa iha asidente fatal ne’e atu rekolla dadus no mos ho evidensia sira ne’e atu lori ba MP tanba sira mak na’in ba kazu ne’e Polísia hala’o nia kna’ar servisu nudar autoridade seguransa, la’os sira nia prezensa atu sai sasin ba asidente ne’e.
“Nu’udar autoridade seguransa, ami hala’o ami nia servisu hodi asegura evidensia sira atu lori ba MP, bainhira Tribunal dehan evidensia seidauk kompleta ami atu buka tu’ir maibé kazu ne’e nia na’in mak MP no desizaun hotu-hotu iha MP la’os Polísia nia kompeténsia.”
Tanba ne’e mak husu ba publiku desizaun iha MP nian la’os iha Polísia, polísia nu’udar autoridade seguransa hala’o nia kna’ar no kompeténsia ne’ebé iha tanba polísia labele halo servisu MP nian.
Tanba ne’e mai ho nia orgaun kompeténsia rasik polísia atu rekolla buat hotu hodi entrega ba MP de’it tanba ne’e sena ba asidente fatal ne’e hatudu momos katak suspeitu soke Vitima iha zebra kross leten polísia la sukat inventa ou hamenus maibé bazeia ba faktus ne’ebé iha no tu’ir informasaun ne’ebé polísia rekolla suspeitu laiha karta kondusaun no mos ho idade 17 tu’ir lei kodigu estrada numeru 6/2003 suspeitu laiha direitu atu hetan karta kondusaun.
Jornalista : Chay Risky