Loluwari Média (Díli) – Direitór Diresaun Tranzitu Seguransa Rodaviariu (DTSR), Superintendente Asistente Polísia, Luis da Costa, informa, Polísia Nasionál Timor-Leste (PNTL) liuhusi Polísia Tranzitu Seguransa Rodaviariu sei bolu inan-aman bainhira oan sira laiha karta kondusaun utiliza motor, tanba inan-aman kontribui oan sira halo krime.
“Ami sei halo pasarevista ba eskola oan sira ne’ebé utiliza motor, maibé laiha karta kondusaun mak ami sei prende hotu lori mai iha Polísia Tranzitu ho ne’e ami husu inan-aman atu hakas oan sira atu hetan karta kondusaun molok utiliza motor ba eskola.” Dehan Direitór DTSR, Superintendente Asistente Polísia, Luis da Costa, ba jornalista sira, iha kuartel Jerál PNTL, Kaikoli, Dili, Tersa (01/04).
“Durante ne’e ami haree kontribuisaun husi inan-aman bo’ot liu ba nia oan sira tanba sosa motor fo ba nia oan sira maibé la haruka oan sira ba trata karta kondusaun. Tanba inan-aman sosa motor ho folin karun maibé atu hasai karta kondusaun ho folin 20 labele tanba inan-aman labele esforsu oan la hetan karta kondusaun.”
Luis hatete, lei kodigu estrada dehan ema ne’ebé ho idade 16 inan-aman bele halo deklarasaun atu nune’e nia oan bele halo karta kondusaun tanba ne’e obrigatoriu tenke hetan karta kondusaun hafoin konduz motor.
“Maibé realidade estudante sira barak mak laiha karta kondusaun maibé konduz motor, tanba ne’e PNTL liu-hosi Polísia Tranzitu Seguransa Rodaviariu afirma iha tempu badak ami sei halo operasaun ba eskola hotu-hotu iha kapital Dili.”
“Polísia Tranzitu tempu badak sei tama sai eskola hodi haree estudante sira ne’ebé uza motorizada maibé iha karta kondusaun ka la’e se laiha mak Polísia tranzitu iha obrigatoriu sei foti hotu motor iha eskola.
Tanba ne’e tranzitu seguransa rodaviaria aviza ba estudante sira hotu atu bele book an halo karta kondusaun se la’e mak ami sei tama eskola Pre-Sekundaria to’o Sekundaria ne’ebé iha kapital dili ami sei tama sai hodi halo pasarevista.”
“PNTL husu ba Professores sira atu koopera ho polísia tranzitu nia prezensa iha eskola sira, karik lalika paniku tanba poltranz hakarak halo prevensaun. Tanba asidente iha kapital Dili kuaze labarik minoridade sira no sira laiha karta kondusaun maibé konduz motor no mos tula malu na’in 2 nain 3 la uza kapasete.
Inan-aman nia kontribuisaun bo’ot ba oan sira tanba hadomi nia oan, sosa motor ba oan sira maibé laiha esforsu atu haruka oan ba trata karta kondusaun.
Tanba ne’e inan aman la hatene katak hola motor ba nia oan sira maibé prepara mos kaisaun ba oan sira tanba hadomi oan sira tenke hadomi mos nia vida keta hadomi nia oan maibe la hadomi nia oan nia vida tanba ne’e sosa motor fo ba oan tenke hatete ba oan atu halai neneik no mos ba trata karta kondusaun molok lori motor.
Jornalista : Chay Risky