Loluwari Média (Díli) – Komandante Munisípiu Díli (KMD), Superintendente Xefe Polísia, Orlando Gomes, hatete, Polisia Nasionál Timor-Leste (PNTL) KMD forma ona ekipa ida hodi halo investigasaun kle’an ba kazu konfrontu ne’ebé akontese iha Tribunal Judisiariu Primeira Instansia Dili (TJPID) iha 28 Marsu foin lalais.
“Kazu ne’e akontese, relasiona ho desizaun husi Tribunal Dili ba kazu matebian Zizelma Maria de Fatima Gonçalves, ne’ebé hamosu insatisfasaun husi familia sira, ikus mai hamosu konfrontu hodi rezulta bin husi suspeitu ba kazu ne’e hetan kanek grave to’o baixa iha Hospital Nasionál Guido Valadares (HNGV).” Dehan KMD, Superintendente Xefe Polísia, Orlando Gomes, ba jornalista sira, iha Komandu Munisípiu Díli, Kuarta (02/04).
Orlando rekuñese, foin daudauk ne’e akontesimentu ida iha Tribunal Dili, ne’ebé rezulta suspeitu ninia feton ka bin hetan kanek grave.
“Iha momentu akontese ita nia alin feto né’e hetan kanek grave husi parte ulun, ita lori duni bá iha hospital nasional guido valadares (HNGV) hodi halo tratamentu.”
Tu’ir informasaun ne’ebé espalla membru polisia sira daudauk né’e fo hela seguransa bá iha vitima né’e iha HNGV, tan ne’e nia rekuñese aloka duni membru polisia sira bá halo vizilansia bá vitima. Gomes haktu’ir.
“Tanba ita haree bá situasaun no informasaun barak, ita nia polisia patrullamentu esquarda Kristu Rei nafatin halo vizilansia bá iha alin ne’e iha hospital nasional guido valadares.”
Tu’ir informasaun parte polisia Investigasaun sira daudauk ne’e hahu rekolla evidensia sira hanesan CCTV, loos duni tanba ne’e mak nia orienta ona Xefe Investigasaun KMD forma ekipa ida atu haree kazu refere.
“Ha’u orienta ona Xefe Investigasaun KMD forma ona ekipa ida atu haree ba kazu né’e. Prosesu la’o hela ekipa ne’ebé mak atende ba prosesu ne’e la’o hela. “Ita sei haree informasaun no evidensia bálu, ne’ebé prosesu ne’e la’o hela.”
Husi akontesimentu ne’e, familia husi alin feto ne’e mos hato’o ona keixa bá polisia no polisia kontinua halo prosesu investigasaun, nune’e bele submete bá dalan legál.
“Sira hato’o keixa, ita aproxima ona bá kazu ne’ebé mak akontese. ita hetan ona informasaun no keixa mos tama ona iha polisia ita kontinua halo prosesu.”
Bainhira vitima rekopera ka alta husi HNGV mak parte polisia investigasaun mos sei bolu vitima refere hodi fo mos informasaun bá iha polisia investigasaun.
“Molok kazu ne’e akontese iha 28 Marsu foin lalais ne’e Tribunal Dili hasai desizaun liberta suspeitu deskunfia konduz motor soke matebian Zizelma Maria de Fartima Gonçalves iha area loja funan buras elemloi. Ikus mai hamosu dezentendimentu entre parte rua hodi rezulta suspeitu bá kazu ne’e nia bin ka feto hetan moras grave iha parte ulun, no dadauk ne’e baixa iha HNGV no seidauk rekupera husi nia moras.”
Jornalista : Chay Risky