Loluwari Média (Dili) – Ministeriu Edukasaun (ME), no Komisaun Funasaun Públika (CFP) fo posse ba manorin bolsa kandidatu 2024 hamutuk na’in 206 hodi desloka ba munisípiu 12 inklui RAEOA hodi hala’o knaar iha Ensinu Pre-eskolar no Ensinu Baziku.
“Emposada na’in 206 ne’e tu’ir ona teste eletróniku iha Komisaun Funsaun Públika (KFP) iha 28 Juñu to’o 17 Jullu 2024.”
Sekretáriu Estadu Ensinu Sekundariu Jerál no Tékniku Vokasional (SEESJTV), Domingos Lemos Lopes, hatete, preparasaun ne’e reflete kompromisiu Ministériu Edukasaun (ME) atu eleva kualidade edukasaun iha futuru, hodi asegura ba manorin sira no bele kontribui ba labarik sira nia futuru no dezenvolvimentu nasaun.
Iha tomada posse ne’e mai husi munisípiu hotu no sai profisional edukasaun hodi dedika sira nia aan no hametin edukasaun liuhusi pre-eskolar no ensinu báziku sira.
“Tomada de pose ba profisionál edukasaun dedikadu sira ne’e nu’udar pasu importante ida hodi hametin sistema edukativu, hodi reprezenta faze foun ida iha sira nia moris no avansu promisór ida ba edukasaun pré-eskolár,” dehan Sekretáriu Estadu Ensinu Sekundariu Jerál no Tékniku Vokasional (SEESJTV), Domingos Lemos Lopes, iha Salaun Ian Martin INFORDEPE, Balide, Tersa (01/04).
Governante akresenta, manorin sira sai responsabilidade atu forma estudante sira nian no inspira sira nia fuan no mós haburas estudante ida-idak nia potensiá ne’ebé laiha limite. Misaun ne’e onradu no nakonu ho dezafiu maibé nakonu ho rekompensa sira.
Lemos haktuir, manorin sira mak parte fundamentál hodi hari’i ambiente aprendizajen ida ne’ebé seguru, inkluzivu no estimulante ne’ebé respeitu no buka kuñesimentu buras, labarik sai maduru iha ida-idak nia sala de aula sira.
“Bainhira ita hahú jornada ida-ne’e, hanoin hetan importánsia kolaborasaun nian, tanba edukasaun nu’udar esforsu koletivu ida, ne’ebé envolve la’ós de’it professor sira, maibé mós família uma laran sira, komunidade sira no ajente hotu-hotu sosiedade nian hamutuk, ita sai forte liu no bele ultrapasa dezafiu saida de’it ne’ebé mosu iha ita-nia dalan,” Lemos afirma.
Ministeriu Edukasaun (ME) reforsa ninia komprimisiu atu apoia edukadór hotu-hotu iha teritoria ida ne’e nia laran, hodi servisu hamutuk atu asegura ambiente di’ak liu ba aprendizajen no kresimentu estudante sira nian.
Presidente Komisaun Funsaum Publiku (KFP), Agostinho Letêncio de Deus, sente orgullu KFP presta testemuña ba manorin foun, ne’ebé ingresa liuhusi rekrutamentu ba bolsa kandidatu ba kuarta faze nian, ne’ebé sei koloka ba eskola sira territóriu nasionál.
Alene iha ambitu serimonia tomada de posse ne’e ba manorin na’in hamutuk 206 ne’ebé iha kareira dosente hodi konstitui ba estratejiku no mekanizmu substituisaun ba forsa traballu.
“Iha ambitu serimónia termu aseitasaun no pose ba pesoál hamutuk 206 kareira dosente, konstitui pasu ida ne’ebé estratéjiku no konstitui mekanizmu substituisaun ba forsa traballu, liliu iha kareira dosente,”dehan Prezidente KFP.
Ministeriu Edukasaun (ME) nu’udar meiu ne’ebé bele muda ema nia kuñesimentu, no husi kuñesimentu sira ne’e bele konstrui ema nia sabedoria, enkuantu sabedoria sai nu’udar aspetu xave ida hodi muda ema ida nia destinu, nune’e, edukasaun prodúz ema “sábio”, fasilmente opurtunidade atu muda sosiedade nia destinu.
Agostinho Letêncio husu emposadu sira ne’ebé ingresa iha kareira dosente hahú hola parte ona mákina Administrativa Estadu nian no dezafia atu iha dezempeñu ida ne’ebé ekstraordinariu, hasa’e boa vontade, responsabilidade no efetividade hodi kontribui ba meta iha setór Edukasaun atu Timor-Leste bele riku liután kualidade, kuantidade no espesialidade sira Edukasaun nian, ba Timor nia di’ak.
Empozadu Juvinal Lay Sarmento, hatete, simu pose nu’udar dalan legalidade ida ne’ebé transforma husi edukasaun atu nune’e ba oin labele mosu dezetendimentu.
Enkuantu, husi dadus 206 ne’e, kompostu husi feto 149 no mane 59, no husi dadus ne’e ME sei koloka manorin na’in 195 ba nivel pré-eskolár, na’in sia (9) ba ensinu baziku no na’in rua (2) ba eskola KAFE.
Jornalista : Anis