Loluwari Média (Dili) – Universidade da Paz (UNPAZ) ho HWPL nu’udar organizasaun ida ne’ebé promove paz hamutuk ho estrutura universidade da Paz, kolabora ho arte moris atu hala’o atividade ida iha unpaz atu pinta moru ho liafuan Paz no Dame.
Representante Reitór Universidade da Paz, Dekanu Fakuldade Siensia Sosiais e Humanidades, Fernando Dias Gusmão, hatete, arte moris hala’o atividade pintura moru iha munisípiu Dili ne’ebé ho tema moris hakmatek no Paz iha Timor-Leste, programa ne’e husi HWPL durante hala’o iha tinan 2023, hala’o konferensia ho Universidade da paz (UNPAZ), involve líder sira husi instituisaun akademiku partisipa promove paz.
“Ita hotu hatene katak arte moris halo ona pintura ba iha moru lolon sira iha Dili laran ho tema moris hakmatek ida tan mak paz iha Timor, ne’e programa ida husi HWPL nian, hala’o ona desde 2023 sa’e mai no husi tinan 2003 ne’e sira mai hala’o ona konferensia ida ho UNPAZ hodi involve ita nia lider sira liliu ita nia instituisaun akademiku sira partisipa atu nune’e bele promove paz iha nasaun ida ne’e, ita nia rai hanesan nasaun ida ne’ebé uluk hasoru konflitu ne’ebé bo’ot fó sofrementu ba ita nia povu tan ne’e ohin loron ita mos hakarak kontribui hari’i paz iha ita nia nasaun”, Dehan Representante Reitór UNPAZ, Dekanu, Fernando Dias Gusmão, iha UNPAZ, tersa (03/06).
Nia hatete, UNPAZ desde tinan kotuk partisipa ona konferensia ida ne’ebé hala’o iha Korea do sul ho tema paz mundiál no agora UNPAZ hakarak iha instituisaun akademiku ida ne’ebé atu introduz liafuan paz ne’e ba estudante sira no ba dosente sira seluk hodi hakribi violensia ne’ebé sempre fó vitima ba sidadaun seluk nune’e paz ba ema hotu moris hakmatek ho harmonia.
Entre tantu estudante UNPAZ livre hola parte iha atividade husi UNPAZ kolabora ho arte moris Timor-Leste hodi pinta moru lolon sira ho liafuan dame no promove ba joventude nia talentu liuhusi pintura ida ne’e.
“Estudante hotu livremente atu hola parte iha atividade ne’ebé sei hala’o husi universidade ne’ebé kolabora ona ho arte moris Timor-Leste, ne’e sei pinta moru lolon sira ho liafuan dame, maibé ida ne’ebé hanesan atu promove no involve makaas liu iha prosesu sira ne’e mak UNPAZ iha departamentu estudu ba paz no mos departamentu relasaun internasional sira mak sempre partisipa programa hanesan hakerek tema sira kona-ba paz”.
Prezidente asosiasaun arte moris, Iliwatu Danabere, hatete, atividade ne’ebé sei realiza iha UNPAZ seidauk iha data fiksu maibe nu’udar prezidente sei organiza membru sira hotu atu prepara ekipamentu sira ne’ebé atu utiliza pinta iha moru lolon area UNPAZ.
“Atividade ne’ebé ami sei hala’o, ne’e la’os arte moris de’it maibé ha’u sei kolabora ho pintor/a Timoroan sira ne’ebé iha talentu kona-ba pinta nian hodi mai kontribui mos sira nia ideia iha atividade ne’e, haree ba iha programa ida ne’e ami sente diak tebes tanba iha koneksaun mos ho ami nia misaun ne’ebé durante ne’e ami hala’o ona sente kontente mos tanba arte moris bele kolabora ho universidade no mos HWPL atu bele pinta liafuan dame sira iha moru lolon area unpaz nian”.
Nia informa husi atividade hola parte iha arte moris nia misaun ne’ebé durante ne’e arte moris hala’o ona iha moru lolon balu ne’ebé durante ne’e arte moris pinta hela no husi atividade ida ne’e mos arte moris espera bele kolabora ideia husi pintor sira ne’ebé iha talentu no mos estudante sira iha unpaz rasik
“Agora daudaun membru arte moris iha pintor lokal hamutuk na’in sanulu resin neen (16) mak hela hamutuk iha sede arte moris no mos ami iha estudante hamutuk ruanulu resin neen (26), ne’ebé agora daudaun ativu hela iha pinta ninian, ha’u mos sei kolabora tan kolega pintor sira ne’ebé iha grupu seluk atu bele hamutuk kontribui ideia ba iha atividade ida ne’e”.
“Uluk luta na’in sira luta ba ukun an no agora hanesan jerasaun foun mai hamutuk atu hapara violensia iha nasaun ida ne’e no mos bele kontribui ba paz iha Timor laran tomak no mos ba iha nasaun seluk tan ne’e arte moris sente kontente ba iha espasu ida ne’e ba iha ekipamentu ba pintura nian ne’e arte moris hetan apoiu husi vinodpatel atu bele pinta iha moru lolon.
Jornalista : Anis