Loluwari Média (Dili) – Direitór Diresaun Tranzitu Seguransa Rodaviariu (DTSR), Superintendente Asistente polisia, Luis da Costa, hatete, akordu kooperasaun entre Polisia Nasional Timor-Leste (PNTL) liuhusi Diresaun Tranzitu Seguransa Rodaviariu ho Empreza HEINEKEN hala’o servisu hamutuk durasaun kada tinan 2 termina ona ohin Heineken ho Poltranz extende tan akordu kooperasaun ba tinan 2025 to’o 2027.
“Durante ne’e ita nia Empreza HEINEKEN kooperasaun diak ho ami no apoiu ami bo’ot tebes hodi ami bele hala’o ami nia atividade oinsa ami bele servisu hamutuk informa ba sidadaun sira atu bele hemu ho responsabilidade tanba ita nia sidadaun sira dala barak hemu hodi konduz transporte halai la kontrola an no hetan asidente barak liu.” Dehan Direitór Diresaun Tranzitu Seguransa Rodaviariu (DTSR), Superintendente Asistente polisia, Luis da Costa, ba jornalista sira iha Diresaun Tranzitu Seguransa Rodaviariu Komandu Jeral PNTL Kaikoli, tersa (10/06).
Luis esplika, Heineken nu’udar emprezariu ne’ebé bo’ot ba serveza nian, tanba ne’e mak PNTL servisu hamutuk ho HEINEKEN nia promosaun ba sira nia produtu ne’e ba sidadaun sira hotu atu bele hemu ho responsabilidade.
“Durante ne’e ita servisu hamutuk diak loos apoiu saida de’it mak ita husu sira sempre apoiu ita, tanba ne’e mak Empreza HEINEKEN sempre apoiu ita ho maximu ha’u espera katak ba oin sira sei apoiu makaas liu ba PNTL liliu iha Diresaun Tranzitu Seguransa Rodaviariu nian.”
Durante ne’e Diresaun Tranzitu Seguransa Rodaviariu no mos Empreza HEINEKEN servisu hamutuk halo sosializasaun ba komunidade no mos ba estudante sira atu bele hemu tua karik hemu ho responsabilidade no konduz transporte ho diak.
“Durante ami servisu hamutuk halo sosializasaun ba Estadu sira liu Universidade sira ne’ebé iha kapital Dili no mos iha tempu badak ami halo sosializasaun ba Motorista Mikrolet sira tanba Motorista dalaruma lori transporte publiku maibé ho kondisaun lanu tanba ne’e Poltranz ho Heineken atu esplika ba sira oinsa hemu ho responsabilidade.”
Tanba dala barak asidente ne’ebé akontese iha fatin-fatin ne’e fator humanu mak barak liu tanba fator dominante asidente barak iha via Publiku ne’e fator humanu.
Diretór Heineken Timor, Komang Satria Wibawah, agradese ba PNTL tanba Heineken ho Diresaun Tranzitu Seguransa Rodaviariu (DTSR) asina akordu kooperasaun durante tinan 2 tanba HEINEKEN nia kooperasaun ho PNTL liliu DTSR tinan naruk ona.
“Ha’u kontente tebes ohin ami bele extende tan ami nia kooperasaun durante tinan 2 nian tanba PNTL nia responsabilidade bo’ot tebes atu asegura nia komunidade sira hodi hemu tua ho responsabilidade. Tanba durante ami nia servisu hamutuk oinsa ami bele halo sosializasaun ba komunidade liliu motorista sira atu bele hemu ho responsabilidade hodi konduz transporte ho diak.”
Empreza HEINEKEN ho Poltranz sempre servisu hamutuk hodi halo sosializasaun ba estudante sira atu bele kuidadu sira nia an husi asidente sira, tanba HEINEKEN Timor-Leste, hanesan Empreza ida hakarak kontribui ba rai ida ne’e ho responsabilidade bo’ot.
“Ami sempre servisu hamutuk ho Autoridade seguransa PNTL liliu Diresaun Tranzitu Seguransa Rodaviariu nian halo sosializasaun tanba ami nia responsabilidade bo’ot ba Timor-Leste ida ne’e no ami prontu apoiu kualker atividade husi PNTL nian ba futuru.”
Jornalista : Chay Risky