Loluwari Média (Díli) – Komandante Munisípiu Dili (KMD), Superintendente Xefe Polísia, Orlando Gomes, hatete sei la tolera membru polisa tranzitu insial AMJ ne’ebé Involve iha kazu dezentendimentu ho komunidade iha area bidau akontese iha loron Tersa (10/06) no sai viral iha media-sosial.
“Kazu ne’ebé akontese iha Bidau-Masaur involve ita nía polisia tranzitu feto ida ne’ebé halo asaltu iha Bidau Masaur. Kazu ne’e dala-ruma publiku sira mos kestiona makaas tanba ne’e ha’u sei loke prosesu investigasaun bá kazu refere, hodi bele prosesa tu’ir lei né’ebé vigor iha Timor-Leste.” Dehan KMD, Superintendente Xefe Polisia, Orlando Gomes, bá jornalista sira iha Komandu Munisípiu Dili, Kuarta (11/06).
Gomes hatete, kazu dezentendimentu né’e entre familia ho familia, tanba diskute malu kona-ba rai, maibé tanba involve ho Polisia Tranzitu halo publiku kestiona makaas no sai viral iha media-sosial.
“Ha’u hakarak atualiza katak, primeiru kazu né’e familiar kona-bá rai, entaun diskute malu entre bin ho alin ikus mai viral los iha media-sosial.”
Depois akontese, komandu munisípiu Dili hetan informasaun husi komunidade sira no komandu orienta kedas polisia patrullamentu postu eskuarda Cristu-Rei tun-kedas ba fatin refere.
“Polisia patrullamentu esquarda Cristu-Rei tun-kedas ba iha fatin ne’eba foti kedas sira lori ba eskuarda Dom Aleixo, hodi halo identifikasaun, no prosesu la’o nafatin.”
“Ohin ita koordena nafatin ho ita nia prokurador, sira foti suspeitu sira-ne’ebé mak ita haree viral iha media-sosial iha video ne’e. Ita foti sira halo identifikasaun, depois ita detein, tanba laiha ema ida iha lei nia leten, ema hotu-hotu iha lei nia okos.”
Tanba ne’e, ba sidadaun sira, tantu polisia sira komete krime, Komandu PNTL sei la tolera, maibé levanta kedas bá prosesu kriminal nian.
“Tanba ne’e se de’it mak komete krime, ita halo prosesu, tantu polisia ita halo prosesu, tu’ir krime né’ebé nia iha. Maske iha kazu ne’e membru polisia tranzitu né’e uza sivil, tanba ita ko’alia kona-bá asaun krime, se mak involve iha asaun krime, ita tenke halo prosesu tu’ir lei ne’ebé iha.”
Komandu mos orienta ona parte polisia investigasaun nian hodi bele Investiga membru polisia inklui Ofisial Polisia Suku (OPS) né’ebé iha kazu dezentendimentu né’e la halo atuasaun, maibé haree de’it.
“Ita hotu-hotu akompaña no haree iha video, saida mak akontese iha terenu, ita nía polisia sira iha ne’eba, ne’ebé mak halo atuasaun. Ita orienta ita nía propost sira atu bele halo xamada urjenti bá polisia né’ebé mak iha terenu, tanba servisu tenke ho profisional para halo atendimentu di’ak bá publiku.”
Bainhira mosu kazu dezentendimentu ruma entre komunidade sira, kuandu polisia ninia prezensa iha né’ebé la mosu tan ona violensia iha fatin akontesimentu.
“Maibé ho ida ne’e komandu sei foti medidas, sei bolu no sei halo investiga hodi hatene loloos, depois mak komandu sei foti medidas ruma.”
Ho kazu né’e, Komandante Munisípiu Dili konsidera katak, ho involvimentu husi Polisia Tranzitu né’e nu’udar aktu responsavel pesoal nian, tanba ne’e krime tenke asume responsavel, no komandu akompaña ninia prosesu sira.
“Tan ne’e, agora daudauk, foti sira halo identifikasaun, depois mak ba detein iha sela, tanba ita detein ba suspeitu sira ne’ebé halo asaun krime.”
Tu’ir informasaun ne’ebé espalla no viral iha media sosial katak, iha loron tersa (10/06) mosu dezentendimentu ida iha area Bidau-Masaur nian né’ebé involve mos husi Membru PNTL husi Parte Tranzitu nian ho Inisial AMJ.
Nune’e, iha dezentendimentu né’e deskunfia membru polisia Tranzitu feto ida baku ferik ida (idade avansadu) monu iha fatin to’o baixa iha Hospital.
Tu’ir informasaun, iha dezentendimentu entre familia ho familia katak, bin ho alin mak haksesuk malu, nune’e ikus mai sai viral iha media-sosial.
Jornalista : Chay Risky