Loluwari Média (Díli) – Komandante Munisípiu Díli (KMD), Superintendente Xefe Polísia, Orlando Gomes, hatete insidente ne’ebé akontese hori kalan mais ou menus tuku 09 ho balu iha area Golgota nian Polísia Nasionál Timor-Leste (PNTL) husi Komandu Munisipiu Dili, bolu ona sasin ba vitima refere hodi buka tu’ir autor prinsipál.
“Ita nia vitima ho naran Mariano de Jesus Pereira, hela iha Kampung Baru iha aldeia 30 ne’ebé ho nia objetivu sosa lilin atu ba halo orasaun iha gruta Golgota nian maibé ho suspeitu deskuñesidu habadak Mariano nia fiar iha dalan ba Gruta Golgota nian suspeitu deskuñesidu sona vitima nia kabun parte liman karuk nian ran turuk hodi hafitar nia isin ho ran de’it vitima la konsege to’o Gruta hodi hasa’e nia orasaun.” Dehan Komandante Munisípiu Díli (KMD), Superintendente Xefe Polísia, Orlando Gomes, ba jornalista sira, iha KMD, Kaikoli, Kuarta (11/06).
Orlando hatete, iha akontesimentu ne’e evakua kedas vitima ba hospital nasional guido valadares (HNGV) hodi halo tratamentu ba nia saude, tanba ran turuk iha nia isin makaas los.
“Ita nia patrullamentu Eskuadra Dom Aleixo ho RIR rapidamenta ba iha fatin akontesimentu hodi buka tu’ir suspeitu sira maibé la hetan ho nune’e ita nia patrullamentu bolu sasin na’in 2 ba vitima nian tanba momentu sasin na’in 2 ne’e mos atu ba halo orasaun iha gruta Golgota nian maibé vitima latan iha estrada ho ran ne’ebé turuk iha nia isin lolon.”
Kona-ba kazu ne’e Investigasaun Eskuadra Dom Aleixo nian halo ona prosesu investigasaun hodi submete ona ba Ministeriu Publiku (MP).
“Kona-ba suspeitu ita nia Sekreta sira sei buka tuir autor prinsipál ne’ebé mak sona ita nia vitima ne’e, agora daudaun ita seidauk hatene motivu husi kazu ne’e tanba vitima mos nia kondisaun grave no seidauk bele ko’alia no sei halo tratamentu nia saude iha HNGV.”
Bainhira vitima halo tratamentu saude rekoperdu ona hafoin PNTL investigasaun bele ba husu informasaun iha vitima refere hodi hatene lolos motivu husi kazu ne’e.
“Hau fo ona orden ba Komandante Eskuadra sira no ita nia Patrullamentu no mos ba ita nia forsa rezerva sira para atu bele halo patrullamentu makaas ba area risku sira ne’e patrullamentu sei halo patrullamentu atu nune’e labele hamosu tan problema iha fatin refere.”
Jornalista : Chay Risky