Loluwari Média (Dili) – Autoridade Protesaum Civil (APC), servisu hamutuk ho parseiru Organizasaun Ai-han Mundial (WFP) hodi haforsa koordenasaun lojistika no resposta emerjensia ba dezastre naturais ne’ebé akontese iha Timor-Leste.
Workshop durante loron rua ne’e atu kapasita staff tekniku sira hodi hasa’e sira nia abilidade halo jestaun logistika, nune’e prepara atu responde situasaun emerjensia bainhira akontense dezastre naturais.
“Ohin ita realiza workshop durante loron rua hodi kapasita ita nia jestór no staff tekniku sira atu hasa’e sira nia kuñesimentu kona-ba jestaun lojistika hodi bele halo preparasaun ba responde emerjensia dezastre naturais iha Timor-Leste”, dehan sekretáriu estadu protesun sivil (SEPS) Domingos Mariano dos Reis, iha City 8, Manleuana, Dili, segunda (23/06).
Objetivu husi programa ne’e atu promove diskusaun kona-ba Kriasaun Grupu Servisu Tekniku Lojistika (KGSTL) ba Timor-Leste, atu promove sistema lojistika emerjénsia ida ne’ebé koordenadu, efisiente no iha tempu loloos.
Autoridade Protesaun Sivil, nu’udar lider ba koordenasaun responde situasaun emerjénsia iha Timor-Leste, hala’o papél sentrál ida iha inisiativa atu atende situasaun emerjensia ne’ebé urjenti.
“Timor-Leste hasoru risku oioin, tanba nia jeografia no klima. Haforsa koordenasaun lojistika iha setór hotu-hotu ne’e importante tebes atu asegura ita nia resposta emerjénsia sira efisiente no atinji sira ne’ebé presiza liu,”
Kapasitasaun rekursu umanu ne’e importante hodi bele hasa’e sira nia kuñesimentu no jestaun bainhira akontese dezastre ho grau/eskala ne’ebé bo’ot sira bele hatene ona maneira atuasaun.
Reprezentante PAM/WFP iha Timor-Leste, Jacqueline de Groot, hatete, WFP liuhusi FBPP no nia parseria ho Grupu Lojístika, servisu hamutuk ho instituisaun nasional sira atu haforsa preparasaun lojistika iha nivel oi-oin.
Workshop ida ne’e hodi investe no iha liña koordenasaun ba lojistika emerjensia iha Timor-Leste ne’ebé iha ona pasu konkretu nune’e bele hamenus impkatu husi dezastre naturais hodi investe iha koordenasaun lojistika emerjénsia.
“Ohin, Timor-Leste foti ona pasu konkretu sira hodi hamenus impaktu dezastre sira nian iha tempu aban” nia afirma.
“Programa ida ne’e nu’udar envolvimentu estratejiku ne’ebé importante hodi hari’i sistema ida forte liu nune’e salva ema nia vida no maneira hodi proteje ema nia moris.”
“Envolvimentu estratejiku ida ne’e mak faze importante atu hari’i sistema ne’ebé forte liu hodi salva moris no proteje maneira buka moris”
Workshop ida ne’e sei realiza durante loron rua hahu husi loron 23-24 junu 2025, no partisipantes mai husi kargu xefia APC, parseiru dezenvolvinentu, PNTL, no mos ajente liñas ministerial seluk ne’ebé relevante ho APC no Universidade Da Paz (UNPAZ).
Jornalista : Anis