Loluwari Média (Dili) – Prezidente Cruz Vermelha Timor-Leste (CVTL), Madalena Fernandes M. Hanjam Costa Soares, hatete selebrasaun CVTL 25 ne’e juveliu ida ne’ebé sai osan mutin ba Cruz Vermelha Timor-Leste (CVTL) depois hetan independensia iha 2002 no eziste iha tempu difisil.
“Ohin halo selebrasaun ba 25, vinte cinco anos ne’e katak selebra jubileu vinte cinco anos osan mutin silver ba iha CVTL depois ita hetan independensia iha 2002, ne’e duni ho ida ne’e durante ida ne’e CVTL halo nia knaar durante iha tempu ne’ebé susar situasaun ne’ebé presiza komunidade populasaun apoiu tebtebes iha Timor laran tomak nune’e mós nia komesa hala’o nia servisu tu’ir regras Cruz Vermelha ne’ebé mak tenke kumpri iha mundu sai mós ba membru 183 iha Zeneva”, dehan Madalena Hanjam iha CVTL, Formoza, Dili, Tersa (24/06).
Durante eziste CVTL ho voluntariamente maibé nafatin iha komitmentu ajuda komunidade, iha tempu difisil no mós Covid-19, inklui mós Papa Francisco, nia vizita Timor-Leste, ho voluntariu kontinua hala’o nia servisu no knaar ne’ebé iha tempu saida de’it, populasaun enfrenta.
Alende hala’o nia aniversariu ba dala 25 Cruz Vermelha Timor-Leste (CVTL) mantein halo nia servisu hodi suporta dezenvolvimentu iha Timor-Leste, mak dada bee moos ba komunidade no kontinua oferese ran ba komunidade sira ne’ebé presiza ran.
“Husi ida ne’e historia agora ho 25 anos Cruz Vermelha mantein iha maturidade atu hala’o nafatin nia servisu hodi suporta dezenvolvimentu nasionál iha ita nia pais iha situasaun ne’ebé defisil purezemplu agora dada be moos ba komunidade kontinua mantein nafatin fo ran ba iha mobilizasaun fo ran ba moras ne’ebé presiza teb-tebes kontinua apoiu joven sira atu sai produtivu primeiru sokorus hala’o iha fatin hotu ida ne’e sai nu’udar papel knaar umanidade nian”.
Cruz Vermelha Timor-Leste (CVTL) la hasai ema husi mukit maibé atu halo reziliente ba komunidade bele moris ne’ebé nia infrenta no situasaun ne’ebé di’ak no difisil.
Prezidente Autoridade Protesaun Civil (APC), Jesuiño dos Reis Matos Carvalho, kongratula ba selebrasaun Cruz Vermelha Timor-Leste (CVTL) no espera halo reflesaun ba atividade hirak ne’ebé CVTL hala’o ona.
“Ha’u kongratula ba CVTL nia aniversariu ne’e ha’u espera katak sira bele halo reflesaun ba atividade tomak ne’ebé mak sira halo liliu ita hatene CVTL dala barak liu servisu ho doasaun depois hanesan iha voluntariu barak. Entaun sira nia atividade barak sira halo enkoraza ema hotu atu partisipa liliu ba ita nia komunidade sira atu bele kuidadu an prevene buat sira ne’ebé mak hamosu dezastre sira”.
Entretantu governu apresia Cruz Vermelha Timor-Leste (CVTL) durante ne’e apoiu governu nia atividade liliu komunidade afetadu ba ai-han no dezastre naturais.
“Governu apresia durante ne’e CVTL mosu atu kompleta governu nia programa atu fo atensaun ba ita nia komunidade sira”.
Jornalista : Anis