Loluwari Média (Díli) – Prezidente Repúblika (PR), José Ramos-Horta, husu estudante Institute of Business (IOB) atu estuda makaas no aprende lingua barak liliu Lingua portugués no Ingles inklui lian sira seluk.
“Ha’u husu ba estudante sira atu estuda makaas no aprende barak liliu aprende materia Matemátika no mos aprende Lingua Portugués no Ingles inklui lian sira seluk atu bele hetan valór diak hodi hetan bolu estudu ba rai liur. Tanba Timor oan barak mak agora sai Profesór no Doutor iha rai barak.” Dehan, Prezidente Repúblika (PR), José Ramos-Horta, ba jornalista sira, iha Institute Of Business (IOB), Fomentu Dili, Sexta (08/08).
Ramos-Horta, hatete, Timor-Leste hetan elizivel bainhira iha territoriu entre Fronteira ho nasaun sira seluk. Tanba ne’e nia husu Estudante sira atu estuda makaas no aprende barak, tanba Timor-Leste agora halo Bilaterál entre Nasaun barak liliu nasaun Dezenvolvidu sira atu bele fo opurtunidade ba estudante oan sira bele ba aprende iha ema nia rai.
“Ita uluk luta atu Timor-Leste, hetan nia independénsia, ohin loron Timor-Leste, hamrik hanesan joven ida. Entaun ha’u husu ba Inan-aman no Dosente sira atu hakaas estudante sira atu estuda makaas no aprende barak loron ruma sira bele implementa saida mak sira aprende ona. Tanba uluk ita nia lideransa sira ne’e aprende uitoan no sempre hasoru dezafiu barak, tanba ita funu ho ita nia inimigu sira.”
“Timor oan barak mak agora sai matenek lemo-lemo iha nasaun bo’ot sira, tanba uluk Timor oan seidauk bele, tanba situasaun mak la permite atu estuda tanba iha situasaun difisil nia laran joven sira atu estuda iha ne’ebé atu hanoin nia moris ne’e oinsa tanba nasaun Indonésia invade Timor-Leste iha tinan 24 nia laran.
“Ohin loron ita livre ona tenke aprende barak, tanba Timor-Leste iha ona mudansa barak no agora ita iha Téknolojia ne’ebé iha atu aproveita hodi estuda maka no adapta Téknolojia barak no estudante tenke aprende barak kona-ba Area Agrikultura, Medicina, Edukasaun no Digitalizasaun.”
Jornalista : Chay Risky