Loluwari Media (Dili) – Sivitas akademia no Asosiasaun Universidade Nasionál Timor Lorosa’e (UNTL) realiza konferensia imprensa kona-ba aktu Polísia Nasionál Timor-Leste (PNTL) liuhusi Diresaun Nasionál Seguransa Investigativu Kriminal (DNSIK) buska Gabinete Reitor inklui kargu xefia na’in lima.
Portavoz, Rio Davio, husu publiku relasiona ho aktu ne’ebé akontese iha UNTL, iha 06 Agostu 2025, PNTL liuhusi Diresaun Nasionál Servisu Investigativu Kriminal (DNSIK), ezekuta mandadu Tribunal judisial Primeira Instansia Dili (TJPID) númeru 0186/25.
Polísia Sientífiku Identifikasaum Kriminal (PSIK) buska no halo apreensaun ba gabinete reitor no estrutura UNTL balu, tanba diskunfia komete prátika falsifikasaun dokumentus balu.
“Aproveita espasu ida ne’e hakarak informa ba públiku no sivitas akademika UNTL tomak, relasiona ho aktu ne’ebé akontese iha Universidade Nasionál Timor Lorosa’e, ita hotu hatene katak iha 6 Agostu 2025, PNTL liuhusi Diresaun servisu invetigasaun Kriminal DSIK ezekuta mandadu Tribunal Judisidial Primeira Instansia Dili, ho numeru 0186/25,
PSIK buska no halo apreensaun ba gabinete reitor no estrutura Universidade balu, tanba diskunfia prátika krime falsifikasaun dokumentu ho anotasaun teknika”. Dehan portavoz, Rio Davio, liuhusi komunikadu Imprensa iha UNTL, Sexta (08/08).
Alende husi buska apreensaun ida ne’e husi sivitas akademika konsidera, Universidade Nasionál Timor Lorosa’e, la,os ona fatin ba produz matenek ho lia los maibé fatin ba prátika krime no sai fatin hodi aproveita ba interese pesoál no grupu.
“Buska no apreensaun ne’e asosiasaun estudantil konsidera UNTL la’os ona fatin ba produz matenek no lia los tu’ir lema UNTL, maibé sai fali fatin ba krime no fatin ne’ebé jestor sira aproveita atinji sira nia interese pesoál no grupu balu ho situasaun ne’ebé akontese.
Asosiasaun akademika estudantil haree katak la’os de’it kazu rua ne’e mak akontese maibé iha mós kazu sira seluk hanesan mal jestaun ba osan kaixa UNTL ne’ebé kada tinan estudante admitidu kontribui 20 dolares inklui gasta osan la tu’ir nesesidade ne’ebé rezulta kantina universidade to’o agora la funsiona.
Maske Universidade fakar osan hodi kontribui kantina refere iha mós kazu sira seluk abuzu poder no kazu asedu sekxual ne’ebé akontese iha fakuldade FMCS” Rio Davio esplika.
“Asosiasaun akademika estudantil konsidera aktu sira ne’ebé akontese iha UNTL ba kazu sira hanesan mal jestaun, falsifikasaun dokumentus, abuzu poder no asedu sekxual sai ona tradisaun aat iha UNTL, ne’ebé prátika husi estrutura Universidade no manori sira.”
To’o publikasaun nutisia ne’e loluwari.tl seidauk hetan resposta husi parte estrutura UNTL.
Jornalista : Anis