Loluwari Media (Maubesse) – Diretór Ezekutivu, Hospitál Referál Maubisse, Virgilio Mendonça Pereira, informa, Hospitál Referál Maubisse infrenta problema menuz stock out ai-moruk hamutuk pursentu 6,2 ka item 24, maibé ida-ne’e laiha problema.
“Kona ba médikamentu stock ai-moruk nia sei tama hela standar, tanba pursentu 6,2, kuandu mais 10% maka dalaruma iha problema, mais durante tinan ida ne’e nia laran no fulan ikus iha Jullu ne’e, stock tama hela standar normál signifika ba ai-moruk sira ne’e bele iha hodi atende ba pasiente sira,” dehan Diretór Ezekutivu Virgilio Mendonça Pereira, ba jornalista sira, iha nia Hospitál Referál Maubisse, Segunda (11/08).
Nia hatete, Hospitál Referál Maubessi liuhusi unidade no departamentu sira sempre halo relatóriu ba Diretór Ezekutivu nia meza nune’e bele hatene problema saida mak Hospitál Referál Maubessi enfrenta.
“Ami iha ne’e bolu morning report kada loron, kada unidade, kada departementu tenke halo relatóriu eskrita mai iha ha’u nia meza, problema saida ne’ebé ohin médikamentu nia tama hela standar 6,2 normál,”
Diretora Servisu Apoiu Diagnóstiku Terapeutiku, Epifania Jose Moniz da Silva, hatete, durante ne’e Unidade Farmásia sempre halo pedidu stok out ba ai-moruk, maibé depende Farmásia Nasionál.
“Ami daudauk ne’e rejistu stok out hamutuk 6,2% ka 24 item, maka esensial no mós nesesáriu, ami sempre halo barter troka kona-bá ai-moruk sira ne’ebé maka laiha, nune’e ami sempre esforsu no depende hotu bá farmansia nasionál,” Epifania Moniz afirma.
Nia informa ORM sempre halo pedidu ba Farmásia Nasionál, halo pedidu dala tolu atu nune’e bele garante Stock out iha ORM.
“Ami halo pedidu iha oin tolu maka regular, extra no mós emerjénsia hodi bele garante stock out, naran stock out, signifiká kuandu ai-moruk vitál esensiál no nesesáriu, kuandu item ida de’it laiha signifiká nafatin iha problema.”
Ospitál Referál Maubisse dalaruma halo transferénsia pasiénte ba Hospitál Nasionál Guido Valadares (HNGV), tanba kauza husi stock ai-moruk no ekipamentu ne’ebé menus.
Maibé dalaruma ami husu, sira iha nasionál mós stock out ai-moruk iha Nasionál laiha, ami labele halo buat ida, atu garante disponibilidade bá stock iha ne’e, entaun ami bazeia bá ami nia pedidu emerjénsia atu taka netik, maibé kuandu stock ne’ebé laiha, ami labele halo buat ida, tanba ami la’os prodúz.”
Kona-bá stock ne’ebé maka Ospitál Referál Maubisse hasoru durante tempu naruk maka hanesan konsumaveis.
Molok ne’e eis Diretóra Armazen INFPM, Cesaltina Bento Gomes, informa, armazen sentrál iha stock ai-moruk hamutuk 40%, no stock disponivél hamutuk 60%, kona-ba nia persentajen ne’e tuituir malu.
“Enjeral ai-moruk iha armazen ne’e pursentu 60 (60%), ida ne’ebé mak stock out 40%, se 40% mak ita sa’e to’o ba 50%, saida mak akontese iha Timor laran tomak ne’e, enjéral ne’e so ai-moruk tama mak nia persentasi tun mais kuandu ai-moruk sai de’it, entaun nia persen sa’e ida ne’e jerál ona mak husi 60% husi armazen tolu (3)”, informa Eis Diretóra Armazen INFPM, ba jornalista sira, iha Kampung Alor, Kinta(17/07).
Nia dehan, tanba ai-moruk sira ne’ebé mak sosá ho emerjénsia ne’e la di’ak, tanba kompras liuhusi emerjénsia ne’e ho nia kuantidade ki’ik, no mós sosá husi prosesu regular ne’e to’o agora seidauk.
“Sim kompras ai-moruk, ne’e emerjénsia la di’ak, tanba mai ho nia kuantidade ki’ik, agora kona-ba ai-moruk reguler ne’e seidauk tama, ne’ebé atu tama ga la tama ne’e kompras nia mak bele esplika”,
Jornalista : Anis