Loluwari Média (Ainaro) – Molok loke atividade Expozisaun komemora loron juventude mundiál ne’ebé husi Alumni Parlamentu Foinsa’e Timor-Leste (APFTL), Oxfam Timor-Leste no Asosiasaun Jornalista Timor Lorosa’e (AJTL) simu matak malirin husi kultura Rabilau iha munisípiu Ainaro postu administrativu Maubisse suku Maubisse Vila, ne’ebé Juventude husi kada munispiu realiza atividade espozisaun ba loron Juventude internasionál mundu tomak selebra.
Xefe suku Maubisse Vila, Wilson Nivio Maria Pereira Mendonça, agradese ba parte hotu ne’ebé eskolla Rabilau sai fatin turizmu Komunitariu ne’ebé juventude produtivu sei halo atividade espozisaun iha Rabilau.
“Agradese ba parte hotu ne’ebé hili ona Rabilau sai fatin ne’ebé aban sei hala’o imi nia atividade interkámbiu, ita bo’ot sira hili ona fatin ida ne’e hanesan Rabilau oan agradese tebes, ho imi nia prezensa sai parte ida ne’ebé bele apoia ami hodi hadia diak liu tan sitiu turiztiku Rabilau ba iha future”. dehan autoridade lokal, Wilson Nivio iha Rabilau, segunda (11/08).
Alende ne’e presensa sai parte ida hodi kontribui fahe hanoin ba fatin turizmu ida ne’e nune’e komunidade Maubisse hato’o ba parte governu hodi hadia fatin turizmu Komunitariu ne’e sai furak iha futuru.
“Ho imi nia prezensa sai nu’udar parte ida ne’ebé bele kontribui ideia ruma ne’ebé bele husik hela iha fatin ida ne’e, nune’e ami komunidade iha Maubisse no Rabilau no mos bele hato’o ba governu hodi servisu hamutuk atu hadia diak liu tan sitiu turistiku Rabilau.
Ami kontente ho atividade sira hanesan ne’e, karik atividade sira hanesan ne’e bele realiza beibeik iha ami nia suku ne’e sai parte ida ne’ebé bele dezenvolve munisípiu Ainaro postu Maubisse liuliu iha area turistiku nian”. xefe suku informa.
Autoridade local ne’e kontente no simu joven kreatividade ka grupu produtivu sira hodi kontinua realiza iha fatin turizmu ida ne’e hodi kontribui ba dezenvolvimentu Timor-Leste.
“Ami simu imi ho kontente, espera katak atividade sira hanesan ne’e kontinua realiza iha fatin ida ne’e, atu nune’e ita hotu bele kontribui hodi hadia ita nia rai liuhusi buat ki’ik (asaun) sira ne’ebé ita hahu halo, ida ne’e sai hanesan parte diak ida, ne’ebé bele motiva ita nia juventude sira liliu juventude kreativu sira ne’ebé mai ho inisiativa diak ne’ebé bele hamosu inovasaun oioin”.
Membru Asosiasaun Parlamentu Foin sa’e Timor-Leste (APFTL), Deviana Sarmento, hatete, atividade espozisaun ne’ebé hili fatin ne’e tanba fatin potensial atu promove turizmu ba mundu.
“Hili fatin ida ne’e atu organiza tanba, ita hateke fatin ne’e hanesan fatin potensial atu kontinua promove la’os de’it iha munisípiu maibé ita hakarak promove ba mundu katak ita moos iha fatin ne’ebé furak”. Deviana afirma.
Alende ne’e selebrasaun loron Juventude mundiál iha mundu hotu-hotu selebra iha (12/08) no mós sei iha atividade lubuk ida hodi realiza expozisaun ne’e.
Membru APFTL ne’e agradese ba lia na’in no komunidade Maubisse ne’ebé oferese fatin ida ne’e hodi realiza atividade tanba atividade ne’e ba juventude iha Timor laran tomak nian no la’ós maske mai husi munisípiu diferente maibé ho kreatividade no produsaun joven nian hodi hamutuk iha fatin ida ne’e.
“Agradese aba lisan husu fatin ne’e, Lia na’in, komunidade ne’ebé simu ona ami iha fatin ida ne’e hodi ita bele realiza ita nia atividade, atividade ne’e ita nian maske ita mai husi munisípiu ne’ebé diferente, maibé agora iha ne’e ita Maubisse oan. Espera liuhusi seremonia ida ne’e ita bele hetan matak malirin, nune’e ita nia atividade bele la’o ho diak”. nia informa.
Jestor ba Peskija no Influensia, Adilson da Costa Junior, husu atu kontinua no diversifika ba joven potensial ne’ebé kreatividade hodi promove produsaun agrikultura joven nian no promove fatin turizmu Komunitariu Rabilau.
“Ami hanoin katak ita tenke kontinua diversifika potensia ne’ebé ita iha, hanesan parte ida ne’ebé bele promove. Ita nia potensia turiztiku no poténsia agrikultor iha Maubisse liliu iha Rabilau.
Hanesan timoroan ita tenke promove fatin ida ne’e, iha potensia barak iha fatin ida ne’e, parese ema barak hatene maibé iha ema barak mos seidauk hatene saida maka Rabilau iha.
“Ita rona de’it maibé bainhira mai direita ita bele sente no haree Rabilau iha nia uniku, iha potensia turiztiku komunitáriu ne’ebé maka ba oin sei bele dezenvolve diak liu tan”. Adilson informa.
Opurtunidade ida ne’e atu komunidade kontinua promove agrikultura, joven produtivu, joven kreatividade sira la’ós de’it iha munisípiu Lautém (Tutuala), Atauro, Baucau no munisípiu sira seluk.
Enkuantu iha 12 Agostu 2025 ba loron Juventude internasionál ba mundu tomak hodi selebra, tanba ne’e iha opurtunidade atu kria espasu hodi organiza halo dialogo ba joven kreativu, foinsa’e agrikultura.
“Aban nu’udar loron juventude mundiál mundu tomak selebra, nune’e ita uza opurtunidade ida ne’e atu kria espasu hodi organiza dialogu entre joven kreativu, foinsa’e agrikultor katak, ita la’os kria problema de’it maibé ita iha potensia no koñesimentu ne’ebé bele fahe ho politika no governante sira”.
Jornalista : Anis