Loluwari Média (Díli) – Portavoz Teresa Jacinta de Fatima Soares, informa, vitima hamutuk na’in 126 ne’ebé hetan evikasaun husi sekretariu estadu assuntu toponomia no oraganisasaun Urbana (SEATOU), tersa ne’e realiza konferensia imprensa hodi fo ultimatu loron 3 ba estadu atu halo klarifikasaun loloos ba sira nia Direitu no dever karik laiha planu ruma ba fatin refere komunidade sira sei reativa sira nia atividade negosiu.
“Ami komunidade eis Aspol ne’ebé sai vitima ba eviksaun ida ne’e fo tempu loron 3 ba governu atu mai direitamente, atu fo klarifikasaun mai ami nia direitu no dever ho loloos karik seidauk iha planu ruma ba fatin ida ne’e mak ami komunidade eis-aspol reativa fila fali ami nia atividade negosiu iha fatin ida ne’e ho razaun tanba durante fulan ida nia laran ami nia ahi matan taka hodi hasusar tebes ami nia oan sira nia futuru.” Dehan Portavoz, Teresa Jacinta de Fatima Soares, ba jornalista sira, iha Kaikoli, Dili, (12/08).
Jacinta hatete, informasaun ne’ebé fo sai katak komunidade vitima ba eviksaun iha eis-aspol ne’ebé simu ona indiminizasaun husi estadu ne’e la los osan ne’ebé sira simu ne’e osan krize 2006 nian maibé osan la’os ba de’it vitima eis-aspol mak simu maibé vitima krize 2006 mak simu hotu.
“Indiminizasaun ne’e ami la simu ami so simu mak osan krize 2006, ami simu maibé osan ida indiminizasaun ne’e ami seidauk simu. Maibé krize ne’e la’os ami mesak mak simu maibé ema ne’ebé mak sai vitima krize 2006 ne’e maioria mak simu”.
Vitima Antonió Gusmao Soares, dehan, pronto koopera ona ho estadu maibé eviksaun liu tiha estadu laiha rekoñesimetu ida ba komunidade sira nia direitu tanba ne’e komunodade sira sei mantein hela iha Aspol tanba fatin ne’ebé sira hela hahu husi 1999 to’o 2025.
“Ami husu estadu loron tolu la mai preokupa ami bairro Aspol, mak ami sei mantein nafatin iha fatin ne’e tanba ami hela iha ne’e hahu husi 1999 mai to’o 2006 mosu krize Loro monu-Lorosa’e no se mak Loro monu-Lorosa’e bo’ot sira mak halo ita fahe malu ka bulak mak sunu ami nia uma mak ohin loron ami sai vitima dala ida tan ba 2025 ne’e.”
Entretantu komunidade hamutuk na’in 126 ne’ebé hetan eviksaun husi SEATOU iha fulan kotuk ba iha Bairro Eis-Aspol seidauk hetan sira nia direitu ka indimisasaun.
Jornalista : Nandes