Loluwari Média (Dare) – Hafoin Média Loluwari.tl halo nutísia publikasaun iha fulan kotuk kona-ba idefisiente ain, Adriano Melo Soares. sidadaun Timoroan ida, Januario Soares, vizita kedas hodi promete atu halo uma mahon.
Fulan ida ne’e, Janurario Soares, hamutuk ho nia maluk joven sira lori materiál konstrusaun hodi halo uma simples ho medida metru 4×6 ba defisiente Adriano.
Situasaun ne’e, Defisiente, Adriano Melo Soares, sente hanesan milagre ida ne’ebé, Januario Soares, naran bolu “Rio” ho nia ekipa tomak ne’ebé konsege hari’i uma mahon.
Uma foun ne’e bele satan ona anin fuik, udan no loron manas ne’ebé tempu naruk Adriano sempre sofre hasoru ho esperansa.
“Ha’u laiha buat murak mean atu fo ba imi hotu nia kolen, liliu ba Maun Januario Soares “Rio” ho nia ekipa, no mós ba ekipa Média Loluwari.tl inklui komunidade sira hotu ne’ebé oferese imi hotu nia tempu ho voluntariamente halo uma ne’ebé hau nia moris tomak ha’u la mehi maibé realidade mahon ne’ebé imi fo mai ha’u, ha’u agradese tebes”. Dehan Difiseinte Adriano Melo Soares, ba loluwari.tl iha nia uma Colau I Dare, kuarta (20/08).
Durante tinan 6 Adriano konta, nia hela de’it ho uma tatis taka de’it ho jinku ferujen, didin ho Au Fohuk, hadak dodok ne’ebé halo ho Au mak sai nia toba fatin bainhira nia presiza deskansa.
“Ohin loron ha’u kontente no agradese tebe-tebes ba imi, ha’u nia oan sira hotu ne’ebé oferese imi nia tempu mai ha’u hodi konstrui mahon dignu ida ne’e mai ha’u atu bele satan netik udan no anin iha tempu loron no kalan”.
“Ha’u la mesak ona maibé imi mak ha’u nia forsa, ha’u agradese tebes ba Maromak katak ha’u nunka méhi atu hela iha mahon hanesan ne’e. maibé milagre Maromak nian ohin ha’u simu ho liman rua atu hela iha uma ne’e ho responsabilidade tomak.” Melo hatete.
Adriano, agradese mós ba ekipa Média Loluwari.tl ne’ebé ho inisitiva fo sai nia preokupasaun ne’ebé konsege hetan atensaun husi sidadaun hotu atu tulun nia.
Alende ne’e, agradese mós ba Januario Soares, ne’ebé ho fuan bo’ot hodi ajuda ema kbi’it la’ek, ema ho difisensia, ema ho vulneravel no mós ba ema aileba oan sira husi Timor laran tomak.
“Maromak haraik isin di’ak no saúde di’ak ba maun Januario Soares “Rio” hodi bele kontinua hala’o nia misaun hodi ajuda ba ema hotu ne’ebé presiza duni ema nia tulun” tenik nia.
Iha sorin seluk Januario Soares “Rio” dehan, hari’i mahon dignu ba Defisiente, Adriano Melo Soares, tanba ema hotu haree katak kondisaun grave tebe-tebes tanba uma la merese ona ba Adriano atu hela.
“Ho kondisaun Tiu Adriano Melo Soares, nian ha’u haree ha’u fuan moras no triste, tanba ne’e ho forsa ne’ebé ita tau hamutuk ho ita nia maluk Timor sira iha rai liur husi Australia, Corea no Inglatera no mós iha rai laran ita konsege halo duni Mahon dignu ida no ohin (kuarta) ita entrega ba Tiu Adriano Melo Soares, hodi hela ba” dehan nia.
Uma ho medida 4×6 ne’e, Nia dehan, kompleta kedas fasilidade uma laran mak hanesan; kulsaun, armari, Ropa, kadeira, Meza, Sana, Tasu, Bikan no Kanuru inklui nesésidade bázika Fos, Supermie, Mina, Fruit Nation, Masin, no sasan sira seluk.
“Tiu Adriano Melo Soares, ohin simu direita husi uma ne’ebé ita entrega ho nia espresaun triste iha kontente nia laran tanba durante nia esperansa mak atu hetan mahon dignu maibé nia esperansa ohin ita entrega duni mahon ne’e ba nia” dehan nia.
Sidadaun Januario Soares “Rio” mós agradese ba Média Loluwari.tl ho nia ekipa no komunidade sira hotu nia sakrifísiu.
“Ha’u espera katak tiu, Adriano Melo Soares, bele kontente hodi utiliza mahon ida ne’e ho di’ak hodi kontinua halo nia atividade lor-loron nian” dehan nia.
Uma ne’ebé Januario Soares, ho nia ekipa halo ho durasaun semana ida tanba ho distansia dook no lalin materiál konstrusaun no montante orsamentu rihun ida resin mak gastus.
Jornalista : Chay Risky