Loluwari Média (Viqueque) – Konsilleiru Maximu Partidu Kmanek Haburas Unidade Nasionál Timor Oan (P.KHUNTO), José dos Santos “Naimori Bucar” hatete, ohin mai Vizita Saudozu, Sebastião Gomes, nia aman tanba familia ida ne’e nia kontribuisaun bo’ot tebes hodi luta ba ukun rasik an. Maun Sebastião Gomes joven ida ne’ebé maduru teb-tebes sai joven ezemplar ba jovens sira seluk.
“Saudozu Sebastião Gomes, nia luta hodi defende rai ida ne’e, komite 12 Novembru iha tanba ita nia saudozu Sebastião Gomes, nia luta ho nia aten brani hodi didika nia an ba rai ida ne’e tanba ne’e mak ohin ha’u mai vizita Saudozu Sebastião Gomes, nia aman hanesan fo onra ba saudozu Sebastião Gomes.” Dehan Konsilleiru Maximu Partidu KHUNTO, José dos Santos “Naimori Bucar” ba jornalista sira iha Uaimori Viqueque, Sabadu (23/08).
Naimori Bucar hatete, ohin vizita saudozu Sebastião Gomes, nia aman atu fo onra ba nia, tanba aman ida ne’ebé bele hetan oan diak ida hanesan Saudozu Sebastião Gomes, maske ohin loron nia la hamutuk ona ho nia aman maibé Maromak sei fo fatin diak ba Saudozu Sebastião Gomes, no fo isin diak nafatin ba Saudozu nia aman.
“Ha’u mai vizita saudozu Sebastião Gomes, nia aman nu’udar Timor oan maske dala wa’in ema haluha ona maibé hanesan humanu ita fo onra ba saudozu Sebastião Gomes, tanba joven ida ne’ebé brani no joven ida ne’ebé se hirus matan ba ita nia rai povu ida ne’e.”
Saudozu Sebastião Gomes, ho nia maluk sira seluk nia luta mak ohin loron Timor-Leste hetan rai ne’ebé livre no fo liberdade ba ema hotu, tanba ne’e mak ema hotu fo onra ba sira.
“Ita nia saudozu Sebastião Gomes, ho nia maluk sira seluk nia luta. Ohin loron sira nia família nunka husu buat ruma ba nasaun atu fo ba sira maibé sira husu atu nasaun ne’e bele hakmatek hodi ida-idak bele hala’o nia moris.”
“Ha’u husu ba joven sira hotu atu banati tu’ir saudozu Sebastião Gomes, atu brani defende lia los no brani halo buat diak ruma ba ita nia rai no ba ita nia povu. Tanba saudozu Sebastião brani hodi defende ita nia rai tanba rai ne’e ita nian nune’e joven sira ohin loron tenke brani defende nia rai. Tanba rai ne’e ita nian no mos ha’u husu ba joven Uaimori oan sira tenke aprende buat barak husi Saudozu Sebastião.”
Saudozu Sebastião Gomes, nia aman, Afonso Gomes, sente orgullu tanba lider Partidu KHUNTO ho nia espoza bele vizita nia iha nia rejidensia no lider Maximu ne’e konsidera Saudozu Sebastião Gomes nudar joven ne’ebé diak no brani hodi defende rai ida ne’e.
“Ha’u sente orgullu tanba durante tinan barak estadu nunka mai vizita ami, hanesan aifunan karik atu namlaek daudauk ona maibé ohin lokraik teki-teki kareta ida mosu mai ha’u hanoin husi estadu nian, maibé ita nia oan “Naimori Bucar” ho nia espoza bele hakat to mai iha ha’u nia uma hodi mai husu ha’u nia kondisaun no fo korajen atu ha’u labele hanoin barak maibé oinsa ha’u bele daskansa barak no han hemu bee barak hodi hala’o hau nia atividade lor-loron.”
Afonso husu obrigadu ba lider Maximu Partidu KHUNTO ho nia espoza bele vizita nia hanesan nia aman no lider maximu ne’e konsidera saudozu Sebastião Gomes, nu’udar jovens ne’ebé brani hodi se hirus matan ba ukun an ida ne’e.
Jornalista : Chay Risky