Loluwari Média (Viqueque) – Konselleiru Maximu, Partidu Kmanek Haburas Unidade Nasionál Timor Oan (P.KHUNTO), José dos Santos “Naimori Bucar” promete, Partidu KHUNTO moris atu tane as uma Lisan iha teritóriu Timor laran tomak bainhira aban bainrua povu fo fiar hetan maioria iha Parlamentu Nasional mak sei fo subsidiu ba Uma lisan iha territóriu Timor-Leste.
“KHUNTO moris atu hari’i Unidade Nasionál, tanba ne’e presiza ita hotu-hotu hamutuk sai forsa ida no bainhira hakarak Nasaun ne’e paz no hakmatek mak ita fo subsidiu ba uma lisan iha territóriu Timor-Leste, atu promove no proteje nafatin ita nia kulturál eransa sira.” Dehan Konsilleiru Maximu Partidu KHUNTO, José dos Santos “Naimori Bucar” ba jornalista sira iha Uaimori Viqueque, Sabadu (23/08).
Naimori Bucar, hatete, bainhira ema ne’ebé hein uma lisan tenke simu osan, tanba Timor-Leste mai ho nia identidade rasik mak Uma Lisan no Kultura atu nune’e sira bele promove nafatin kultura iha Timor laran tomak.
Tanba ema ne’ebé hein uma lisan hein lulik atu hamulak no fo matak malirin ba ema hotu atu moris iha paz no dame nia laran. Tanba sa mak ita labele fo osan ba nia, bainhira KHUNTO kaer ukun fila-fali mak sei fo subsidiu ba uma lisan hotu-hotu atu nune’e sira nafatin promove ita nia kulturá sai identidade no bele mos sai turizmu lokal hodi atrai turizta sira ba vizita.”
“Timor-Leste mai ho nia identidade rasik mak kulturá no lisan, tanba ne’e mak osan mina nian emprezariu sira mak manan temi mak osan povu nian maibé povu nunka sente no kaer ne’e labele, atu halo politika ne’e tenke haree se lae emprezariu mak hetan osan no maun bo’ot sira mak manan pursentu maibé povu nunka sente”. Naimori afirma.
“Ita atu kuidadu no servi ita nia povu ne’e labele matan delek maibé kurize Maun bo’ot sira bainhira sala dehan sala los dehan los se lae labele, tanba atu halo politika laos atu sai bo’ot de’it maibé halo politika atu sai servidor ba povu.”
Tanba ne’e Khunto nia luta hakarak hadi’a no muda sistema familiarizmu Timor nian nune’e povu bele sente netik buat ruma iha sira nia moris.
Governu ukun dala barak hadia estrada maibé povu nia kareta hira mak halai iha estrada ne’e diak liu osan mina nian fo ba povu atu sente no hodi hadia nia moris.
Prezidente Partidu KHUNTO, Armanda Berta dos Santos, hatete, KHUNTO hetan asentu iha Parlamentu Nasional ho kadeira lima (5) sura mos ho votus kompatriota sira husi munisípiu Viqueque liliu mos suku Uaimori Tula nia sakrifisiu no servisu makaas.
“Tanba ne’e mak ha’u husu ba Estrutura Emposadu sira hotu atu servisu makaas hodi bele fo vitória ba Partidu KHUNTO iha 2027 no 2028.”
Partidu KHUNTO moris hasoru dezafiu oi-oin maibé firme nafatin hasoru laloran bo’ot hodi la’o ba oin atu haree no servi povu Timor-Leste.
“Iha oitavu Governu Konstitusionál ita hola parte. Ita konsege fo subsidiu ba Timor oan sira $ 200, no mos fo subsidiu ba inan isin rua sira atu bele sente osan povu nian la’os kompaña ho emprezariu sira mak hetan de’it osan no timor oan balu mak hetan pursentu.”
Jornalista : Chay Risky