Loluwari Média (Viqueque) – Konsilleiru Maximu Partidu Kmanek Haburas Unidade Nasionál Timor Oan (P.KHUNTO), José dos Santos “Naimori Bucar” husu ba emposadu sira atu servisu makaas hodi bele fo Vitória ba Partidu KHUNTO iha eleisaun 2028 husu Autoridade lokál suku Uaimori no Aldeia Lulei ne’ebé simu kadeira 200 no kalen atus (200) atu kuidadu didiak hodi utiliza ba nesésidade suku.
“Ha’u husu ba emposadu sira ne’ebé ohin simu pose liliu ba Estrutura Reajustamentu Partidu KHUNTO munisípiu Viqueque atu fiar malu servisu hamutuk. Tanba KHUNTO moris atu hari’i Unidade Nasionál hafoin sai servidor ba nia povu. Ha’u husu ba Autoridade lokal sira simu kadeira no kalen atu kuidadu hodi utiliza ba nesésidade suku tanba KHUNTO fo kadeira no kalen la’os husu imi atu vota maibé nu’udar Timor oan, bainhira suku ne’ebé presiza, ami tenke apoiu tu’ir nesésidade ne’ebé ami iha.” Dehan Konsilleiru Maximu Partidu KHUNTO, José dos Santos “Naimori Bucar” ba jornalista sira, iha Uaimori, Viqueque, Sabadu (23/08).
Naimori hatete, Partidu KHUNTO mai ho nia Filosofia “Tane O Rai O Emar no O Lisan” hodi hari’i Unidade Nasionál, tanba ne’e mak ohin mai halao reajustamentu strutura Partidu iha munisípiu Viqueque Postu administrativu Viqueque suku Uaimori oferese mos kadeira 200 no kalen tahan 200 ba autoridade lokál hodi utiliza ba nesésidade suku.
“KHUNTO moris atu hari’i Unidade Nasionál ho espertu atu defende buat loos bainhira aman sira halo buat ne’ebé sala ami tenke hase hadi ukun povu ne’e ho diak labele fo moris ba emprezariu sira no kompaña sira maibé ita nia povu ne’e kuidadu moris kiak ba bebeik.”
Koordenador Partidu KHUNTO munisípiu Viqueque, José Celestino, hatete, konsolidasaun Reajustamentu strutura Partidu KHUNTO ho emposadu hamutuk na’in 200 resin iha munisípiu Viqueque no postu administrativu sira inklui suku no aldeia atu hametin Forsa Politika Partidu KHUNTO hasoru eleisaun parlamentar 2028.
“Khunto moris ho nia filosofia “Tane o Rain o Emar no o Lisan” sei suli neon badaen hamutuk ho forsa ida ne’ebé nakonu produtivu lori ksolok wain ba nasaun no povu nia moris diak.”
Jose Celestino husu emposadu sira atu servisu makaas hodi bele fo Vitória ba partidu KHUNTO iha elesaun parlamentar 2028, ohin imi simu pose atu servisu makaas liliu iha baze atu bele fo vitória ba Partidu KHUNTO iha munisípiu Viqueque.
“Partidu KHUNTO ohin fo posse ba strutura reajustamentu iha munisípiu Viqueque no konsilleiru Maximu partidu KHUNTO ho Prezidente Partidu ofisiálmente oferese kadeira 200 no kalen 200 ba Autoridade lokál suku Uaimori no aldeia Lulei ho utiliza ba nesésidade suku.
Iha sorin seluk xefe suku Uaimori salient, iha suku Uaimori Tua nakloke ba Partidu hotu-hotu atu bele mai hala’o nia atividade partidu no mos ko’alia nia politika no Autoridade ne’e agradese ba Konsilleiru Maximu Partidu KHUNTO ho Prezidente Partidu no mos estrutura ne’ebé oferese kadeira no kalen ba suku Uaimori.
“Ha’u hanesan autoridade lokál ha’u sempre fo opurtunidade ba kualkér Partidu atu mai iha ami nia suku Uaimori hodi ko’alia nia programa, tanba nasaun Demokrásia, Povu mak deside no hili tu’ir sira nia konsensia, ha’u husu mos ba strutura emposadu sira ne’ebé ohin simu pòse atu servisu makaas hodi fo vitória ba imi nia Partidu.”
“Ha’u fo obrigadu no agradese tanba Partidu Khunto bele oferese kadeira no kalen mai ami nia suku atu nune’e ami bele utiliza ba nesésidade suku nian liliu ba lia moris no lia mate.”
Jornalista : Chay Risky