Loluwari Média (Lospalos) – Prezidente Autoridade munisípiu Lautém (PAM), Melio de Jesus, hatete, ohin komunidade munisípiu Lautém, estudante, autoridade lokál, funsináriu publiku no Polísia Nasionál Timor-Leste (PNTL), Forsa Defeza Timor-Leste (F-FDTL), Veteranus no kombatente libertasaun Nasionál selebra loron historiku Falintil ba dala 50 iha munisípiu Lautém ho diak maske ladun hetan partisipasaun maximu husi komunidade inklui veteranus sira tanba distansia.
“Ha’u nia parabéns ba assuwa’in sira ne’ebé dedika no sakrifíka sira nia an ba rai ida ne’e nia independénsia ne’eduni Ministériu Defeza (MD) no Forsa Defeza Timor-Leste (F-FDTL), hala’o selebrasaun loron Falintil, kada rejiaun no ohin iha rejiaun Ponta-Leste, hanesan mos munisípiu Lautém, sai mos fatin historiku ba Libertasaun Nasionál.” Dehan Prezidente Autoridade Munisípiu Lautém (PAML), Melio de Jesus, ba loluwari.tl iha Munisípiu Lautém, Segunda (18/08).
Melio esplika, atividade ba seremonia aniversariu Loron Falintil ne’e realiza tanba PAM servisu hamutuk ho MD no F-FDTL husi preparasaun iha 4 Jullu la’o diak tebes tanba iha Feira, Karawan, Sertame, Puzia no atividade kulturál sira seluk to’o ohin loron buat hotu la’o diak maibé komunidade no Veteranus sira nia partisipasaun mak ladauk maximu maibé tanba problema distansia veteranu barak hela iha postu admistrativu no suku inklui aldeia tanba ne’e sira labele marka prezensa iha loron importante ida ohin.
“Ita nia mobilizasaun ba veteranu sira atu partisipa maximu ba loron espesiál ba 20 de Agustu ne’e ho voluntariu no sakrifisiu ida-idak nian tanba ita laiha orsamentu verbal ba sira, tanba ita nia veteranu sira la hela iha munisípiu Lautém de’it maibé sira hela iha postu administrativu, suku no aldeia, tanba ne’e ho kondisaun sira nia saúde sira labele marka prezensa maximu iha loron importante ida ne’e.”
Komunidade nunka sente ohin loron importante sira nian, tanba sira nia sakrifísiu mak ohin, Timor-Leste, hetan nia independénsia maibé komunidade mak seidauk sente ba loron historiku sira ne’e.
“Ami la’os dehan la ko’alia maibé, ami aviza hotu ona. Maibé sira mak seidauk sente no seremonia la’os obrigatóriu maibé sira mak laiha spiritu Nasionálizmu no patriotizmu ba nia rai rasik.”
Prezidente Consellu Combatente Libertasaun Nasionál (CCLN), Aurelio Freitas Ribeiro, hatete, loron Veteranus no kombatente sira nia naran lori sentimentu onra no gloria ba heroi no heroina Asuwa’in Falintil sira ne’ebé sakrifíka sira nia vida ba rai no povu ida ne’e.
“Ha’u nia hakruk ba Falintil sira ne’ebé sei moris no ha’u nia solidaridade ba faluk no oan kiak sira ne’ebé lakon nia familia tan rai no povu ida ne’e, loron Falintil ba tinan 50 atu reflete no hanoin hikas ba pasadu ne’ebé nakonu ho Aitarak ne’ebé ita nia liman kroat Falintil sira hasoru.”
“Ohin ita haree veteranus no Komunidade ladun partisipa maximu, tanba kestaun distansia no sira nia saude. Tanba sira nia kontribui ba rai ida ne’e tama ona ba 70 anos ba leten, entaun sira mos labele marka prezensa iha loron espesiál ida ne’e.”
Munisípiu Lautém iha Veteranus no kombatente libertasaun Nasionál ho grau 8 a 14 ba leten hamutuk 1.350 ne’e veteranus 20 a 24 anos 15 a 19 anos no 8 a 14 inklui Frente klandestina no frente Diplomata sira ne’ebé estadu rekuñese ona.
Jornalista : Chay Risky