Loluwari Média (Díli) – Inisiativa Prezidénsia Repúblika atu fó apoiu ba família vulnerável iha Ermera enfrenta reálidade triste, depois señora, Berta de Jesus, ho idade 63, distiñu sedu, antes uma foun ne’ebé konstrui ba nia familia ne’e remata.
Uma foun ba família José Maria Sarmento no nia ferik oan, Berta de Jesus, konstrui iha Aldeia Coliate-Leotelo, Hatulia, Ermera. Progresu konstrusaun foin atinji pursentu 50 (50%), no familia seidauk bele utiliza uma ne’e. Maibé iha Kinta (28/08), oras 08:00, maktoba Berta i’is kotu tanba moras ne’ebé nia sofre durante tinan ida resin ona.
Maktoba Berta de Jesus, moris iha 19 Abril 1962, husik hela oan na’in rua, ida ajuda inan-aman iha to’os laran, no ida seluk servisu nu’udar motorista/konjak.
Familia Sarmento, deklara tristeza profunda, tanba lakon inan no membru importante iha família, maibé mos reafirma sei kontínua simu apoiu ba remata uma foun ne’e husi Prezidénsia Repúblika.
Parte Prezidénsia Repúblika, liuhusi Unidade Servisu Sosial, konfirma ona katak konstrusaun uma ne’e sei kontínua nafatin, maske família ne’e hasoru situasaun todan no triste. Prezidénsia Repúblika mos sei fó kaixaun ba família matebian, ho osan $ 500.00 ba funeral no ajuda nesesidade seluk.
Jornalista : Chay Risky