Loluwari Média (Díli) – Polísia Nasionál Timor-Leste (PNTL) rejista kazu tara aan hamutuk 13 durante fulan haat hahú husi fulan Outobro 2025 to’o fulan Fevereiro 2026.
Diretór Diresaun Servisu Investigasaun Kriminál (DSIK), Superintendente Polísia, João Belo dos Reis, hatete,husu Komunidade atu labele hili dalan nakukun hodi estraga aan nia vida.
“Ita rejista kazu tara an hamutuk 13 ne’e laos númeru de’it maibé ami autoridade seguransa PNTL mós hakarak fó hatene ba sidadaun sira hotu sente todan ba moris sente presaun no sente laiha dalan seluk favor labele foti desizaun mesak tara aan”Dehan João Belo dos Reis ba jornalista sira iha Edifisiu Ministériu Interior Villa-Verde Díli, kinta (05/02).
Nia dehan, komunidade sira labele buka dalan nakukun hodi rejolve rasik problema ne’ebé sira hasoru hodi halakon ninia vida rasik.
“Ami husu ba Inan-Aman,alin, Viziñu sira haree didi’ak família sira ne’ebé sente mesak halo favor bele rona sira ho fuan atu bele salva sira nia vida labele husik sira mesak hasoru situasaun ka problema ne’ebé sira hasoru.”dehan nia.
Vida,Tuir Nia,mak prezente ne’ebé bo’ot liu, Polísia la’os atu kaer de’it Kriminál maibé PNTL preokupa seguransa mentalidade sidadaun sira nian.
Tanba ne’e bainhira ema ruma koko atu oho an favor bolu lalais Polísia ou eskuadra ne’ebé besik atu bele ajuda sira atu labele halakon vida.
“Problema tara aan ka oho aan ne’e nia problema ne’e halai liu ba Problema familia nian problema iha relasaun ba domin nian inklui Problema ekonomia uma laran”dehan nia.
Tanba ne’e PNTL husu ba família tanba papél Família nian ne’e importante tebes atu koalia ho familia uma laran halo amizade ne’ebé di’ak.
Ho familia uma laran atu nune’e familia labele sente mesak no moris iha presaun nia laran hodi bele moris ho paz harmonia nia laran.
Jornalista : Cesar Pires
Editór : Herminio Cardoso