Loluwari Média (Dili) – Defensoria Públika Uniaun (DPU) Brazileira na’in rua Dra.Ludmylla Mariana Anselmo ho Dr.Kelery Dinarte da Páscoa Freitas to’o ona Timor-Leste ne’ebé sei reforsa kualidade servisu iha setór Justisa durante Tinan ida.
Defensór Públiku Jerál (DPJ) Cancio Xavier hatete,Defensór na’in rua nia prezensa iha TL importante tebes tanba sei reforsa servisu nu’udar asesoria no Formadór durante Tinan ida.
“Ita presiza ema sira ne’e mais espesializadu atu mai iha servisu asesoria no mós iha servisu sira ne’ebé sai formadór iha sentru formasaun atu bele garante sustentabilidade dezenvolvimentu kualidade rekursu Defensoria ninian”dehan nia ba jornalista sira iha sala VIP Aeroportu Internasionál Comoro Sesta-Feira (20/03).
Nia haktuir,ida ne’e hanesan parte integrante ida ne’ebé entre Defensoria Públika TL ho Defensoria Públika Uniaun Brazil ne’ebé através mós Koopersaun Ajénsia Brazíl (sigla-portugés ABC).
Tanba kooperasaun entre nasaun rua ne’e tempu naruk tebes,iha ne’ebé metin kleur ona desde Tinan 2005 ate agora sempre apoiu malu tanba Defensoria Publika TL menus rekursu umanu ne’ebé presiza apoiu.
Nia dehan,iha akordu kooperasaun ba etapa dala-8 ne’e sira mai ho misaun ida de’it para oinsa atu bele haree kona-ba progresu servisu kontinuasaun ne’ebé mak presiza halo espansaun espesialista sira ne’e iha TL.
“Ita hanoin katak presiza iha kooperasaun ita hetan kooperasaun ida ne’ebé kontribuisaun Defensór sira husi Brazileira ne’e atu mai halo servisu hanesan Anteriór,ida ne’e ita nia dezeju”dehan nia
Tanba Defensoria Públika TL ho Brazíl iha sistema ne’ebé hanesan tantu iha sistema administrativa no patrimóniu.
Iha fatin hanesan,Embaxadór Brazil iha TL Ricardo José Lutosa Leal agradese ba prezensa Dra.Ludmylla ho Dr.Dinarty ne’ebé sei kontribui setór Justisa iha TL.
Embaxadór Brazil ne’e orgullu tanba bele kontribui husi kooperasaun entre Defensoria Públika TL ho Brazíl ne’ebé desde Tinan 2005 iha setór justisa TL.
“Kontente tebes tanba Dra.Ludmylla to’o ona (TL) ho Dr.Dinarte atu bele koopera malu iha ámbitu kursu kapasitasaun ba Majistratura sira”dehan nia.
Enkuantu Defensora Públika Dra.Ludmylla Mariana Anselmo kontente no sei reforsa servisu Defensoria Publika TL durante tinan ida halao misaun iha TL.
Nia haktuir,primeiru sei halo adaptasaun uluk ambiente servisu Defensoria Publika TL no espera partisipa hodi bele kontribui.
“Di’ak ha’u servisu diretamente ho Defensoria Públika,primeiru ita sei koñese uluk realidade lokál depois haree oinsa mak ha’u bele hodi kontribui”dehan nia.
Ekipa Loluwari