Loluwari Média (Díli) – Polísia Nasionál Timor-Leste (PNTL) seidauk hatene motivu husi inan ida ne’ebé tenta atu soe nia bebe iha Dom Bosco Comoro Postu Administrativu Dom Aleixo Munisípiu Dili Foin lalais ne’e.
Xefe Seksaun Investigasaun Kriminál Munisípiu Díli, Superintendente Assistente Rogério Dos Reis hatete, iha loron 13/06/26 maizomenus oras haleu ba tuku 10 ho balun iha area Dom Bosco suspeitu ida ho naran inisiál AMG ho idade 20 resin tenta atu soe nia bebe.
“Orientasaun husi ita nia Amu Parokia Dom Bosco nian konsege lori Bebe oan ne’e ba Sentru Saúde Kampung baru hodi halo tratamentu no PNTL liu-husi Komandu Munisípiu Díli inklui VPU Díli ho rapidamente to’o kedas iha fatin lokál ba krime nian hodi asegura suspeitu no ba iha parte médiku nian hodi halo tratamentu ba nia no kontinua mai iha VPU hodi halo prosesu ba nia.” Dehan Xefe Seksaun Investigasaun Kriminál Munisípiu Díli, Superintendente Assistente Rogério Dos Reis ba jornalista sira iha Komandu Munisípiu Díli Kaikoli, Segunda Foin lalais ne’e.
Nia dehan, oras ne’e Bebe ho nia inan parte Saúde halo tratamentu ba nia iha Hospital Nasionál Guido Valadares (HNGV) bainhira nia kondisaun rekopera mak bele entrega ba nia família sira.
“Suspeitu agora dadaun ho nia oan iha HNGV no ita sei prega ho Artigu tentativa Kódigu Penál Timor-Leste nian iha Artigu 23 no 143 kona-ba Inan abandona la kuidadu nia oan no tau iha risku nia laran nia tama iha kategoria tentativa Espozisaun Abandonadu”dehan nia.
Sidadaun feto ne’e hanesan funsionáriu ida iha dormitóriu Dom Bosco nian bainhira nia partus bebe oan ne’e nia falun ho hena tau iha nia fatin hodi telefone ba nia kolega servisu iha dormitóriu Dom Bosco nian dehan nia hetan Bebe ida.
Maibé realidade bainhira PNTL identifika katak nia mak tenta atu soe nia oan,no oras ne’e PNTL nafatin halo indentifikasaun ba Bebe nia aman bainhira Bebe nia inan rekopera nia kondisaun Saúde.
Jornalista : Cesar Pires
Editór : Herminio Cardoso