Loluwari Média (Díli) – Ministru Defeza (MD), Donanciano Costa Gomes “Pedro Klamar Fuik” simu vizita kortezia husi Ministru Defeza São Tomé e Príncipe, Horácio Trindade Sousa iha Kuartel jerál Fatuhada Díli.
Iha enkontru ne’e,omólogu husi São Tomé e Príncipe mai iha TL hodi partisipa iha Reuniaun Ministru Defeza CPLP ba dala 25, ne’ebé TL mak sai uma-na’in ba organizasaun ne’e.
“Iha ita-nia istória de libertasaun, iha tempu susar sira hotu, países CPLP sira hotu-hotu inkluzivamente São Tomé e Príncipe hamutuk ho ita,Sira moris iha ita-nia problema, sentimentu, terus, no sira solidariza hodi fó apoiu iha fórum hotu-hotu,” Dehan Ministru Defeza (MD), Kontra Almirante Donanciano Costa Gomes “Pedro Klamar Fuik” ba jornalista sira iha Kuartel General Fatuhada Díli, Segunda (01/06).
Ministru hatete,maske depois de independénsia, apoiu ne’e kontinua la’o nafatin tuir kbiit ne’ebé iha tanba enkontru ne’e importante tebes atu rona malu, fahe hanoin no koñese problema hodi bele kria parseria ne’ebé di’ak liu ba futuru.
Iha fatin hanesan, Ministru Defeza São Tomé e Príncipe, Horácio Trindade Sousa, manifesta nia haksolok tanba bele fahe koñesimentu kona-ba realidade no dezafiu ne’ebé nasaun rua ne’e hasoru nu’udar nasaun maun-alin.
“Ita-nia relasaun sira-ne’e loron ba loron sai metin liután. Kada enkontru ka reuniaun ne’ebé ita halo, inklui iha fórum internasionál sira, ita nafatin hatudu ita-nia lasu amizade ne’ebé metin, no ita sei mantein ida-ne’e ba ita-nia nasaun no povu rua”dehan nia.
Reuniaun Ministru Defeza CPLP ne’ebé hala’o iha Díli ne’e sai hanesan oportunidade ba Timor-Leste hodi hametin koperasaun iha setór defeza no seguransa ho nasaun sira ne’ebé ko’alia lian portugés.
Jornalista Estajiariu : Quintão dos Santos Tilman
Editór : Herminio Cardoso